Բացի մեծավարի խորհուրդներից, որևէ այլ բան չի եղել. Նաղդալյանը՝ Արփինե Հովհաննիսյանի և իր հարաբերությունների մասին

ԱԺ փոխնախագահ Հերմինե Նաղդալյանի հավաստմամբ՝ լուրերն այն մասին, թե ՀՀԿ կանանց միջև վեճեր են՝ ցուցակում ընդգրկվելու համար, իրականությանը չեն համապատասխանում։ «Պարզապես ստահոդ տեղեկատվություն է»,- այսօր խորհրդարանում լրագրողներին ասաց նա՝ հավելելով, որ ՀՀԿ-ի ղեկավարը բազմակողմանի ճանաչում է բոլորին և նրանց պոտեցիալը։

Արձագանքելով դիտարկմանը, թե մամուլում շրջանառվում են իր և Արփինե Հովհաննիսյանի «հակամարտության» մասին տեղեկություններ, Նաղդալյանը նշեց. «Մենք միասին եղել ենք ԵԽԽՎ խմբում, իմ կողմից, բացի հոգատարությունից, բացի մեծավարի խորհուրդներից և սրտացավությունից, որևէ բան չի եղել։ Վստահ եմ՝ ինքն էլ է այդպես մտածում»:

Խոսելով նախկին ՀՀԿ-ական, Հովիկ Աբրահամյանի ազգական Կարինե Պողոսյանի կողմից կուսակցությունը լքելու մասին՝ Նաղդալյանը նշեց. «Նրա հետ խոսել չեմ կարողացել, որովհետև հեռախոսն անջատված է եղել: Գիտեմ, որ նաև փոքր-ինչ վատառողջ է եղել»:

Հարցին, թե կանանցից ովքե՞ր կառաջադրվեն ռեյտինգային ցուցակներով, կա՞ արդեն հստակեցում, Նաղդալյանը պատասխանեց. «Մոտ օրերին կհստակեցվի ցուցակը։ Ես էլ կառաջադրվեմ այն ձևով, ինչպես կորոշի կուսակցությունը»: