Բանակի մատակարարման գործընթացում պետք է բացառել միջնորդ ընկերություններին. նախարար

Այսօր` լրագրողների հետ հանդիպման ժամանակ, պաշտպանության նախարար Սեյրան Օհանյանը խոսեց բանակի մատակարարումների ոլորտի խնդիրների լուծման մասին: Նա նախ նշեց, որ բանակը երկրի  խոշորագույն գործատուն է, գնումներ կազմակերպողը,  և կարևոր է,  որ այդ գնումների կազմակերպումը լինի արդյունավետ, ապահովի լավագույն որակ` նվազագույն հնարավոր գնով:

Նախարարը նշեց, որ բանակի բոլոր մատակարարների հետ անցկացվելու են հանդիպում-քննարկումներ, հիմնական սկզբունքն այն է, որ բացառեն միջնորդ կազմակերպությունների մասնակցությունը բանակի մատակարարման գործին:

«Կան մատակարար ընկերություններ, որոնք այդ ապրանքի արտադրությամբ զբաղված չեն, ոչ էլ  ներկրում են, ինչը նշանակում է, որ այն միջնորդ կազմակերպություն է, որը որոշակի ծառայություններ է մատուցում դրա դիմաց` շահույթներ ստանալով»,- ասաց Վիգեն Սարգսյանը:

Ինչ վերաբերում է մատակարարման գործընթացի չարաշահումներ իրականացնողներին, նախարարը նշեց. «Բոլորս սիրում ենք պատժիչ գործառույթը տեսնել կիրառման մեջ: Որքան էլ համոզված լինեմ, որ պետք է գնանք խախտում կատարողների հետևից, այնուամենայնիվ, պատժի տեսակները տարբեր են լինում, դրանք սահմանված են օրենսդրությամբ` սկսած պայմանագրով նախատեսված սանկցիաների կիրառումից, մինչև քրեական գործերի հարուցում»:

Սարգսյանը հավելեց, որ շատ դեպքերում գործարարի համար հսկայական տույժ-տուգանքներ սահմանելը կարող է լինել ավելի մեծ պատիժ, քան քրեական գործի հարուցումը: Այնուամենայնիվ, նախարարությունը  յուրաքանչյուր խախտման հետևից գնալու է և թույլ չի տալու հարստացում զինվորի հաշվին: