ՀՀԿ-ում ներքին հեղափոխությո՞ւն է սկսվել

ՀՀԿ-ի ներսում վերջին օրերին արձանագրված իրադարձությունները, առաջին հերթին՝ Հովիկ Աբրահամյանի հեռանալը «հարազատ» կուսակցությունից, վերջնականապես հաստատեցին տեղեկությունները, որ ՀՀԿ-ում լուրջ գործընթացներ են ընթանում: Ընդ որում՝ այդ գործընթացում արդեն տեսանելի է դառնում Կարեն Կարապետյանի դերակատարումը: Հովիկ Աբրահամյանի հեռանալը թե՛ քաղաքական վերնախավում և թե՛ հասարակական դաշտում դիտարկվում է որպես վարչապետի հաղթանակ: Սպասվում է, որ դրան հետևելու է իրենց տրամաչափով թեպետ ավելի փոքր, բայց նույնպես ազդեցիկ ու կասկածելի համբավ ունեցող այլ գործիչների ազդեցության չեզոքացումը: Նշված գործընթացների արտացոլումը, ամենայն հավանականությամբ, տեսանելի կլինի ՀՀԿ խորհրդի և, առավել ևս, կուսակցության համամասնական ցուցակի անհատական կազմի վերջնական հաստատման ժամանակ:

Ըստ հանրապետականների՝ Կարեն Կարապետյանը կուսակցություն մտնելիս պայման է դրել, որ պետք է ունենա լայն ներկայացվածություն ապագա խորհրդարանական խմբակցության կազմում: Արդեն այն ժամանակ վարչապետը պնդել է, որ երկրում քաղաքական էլիտայի փոփոխություն է անհրաժեշտ: Ի դեպ, քաղաքական էլիտայի փոփոխության անհրաժեշտության մասին նա երեկ բաց հայտարարեց «Միր» հեռուստաընկերության եթերում: