Տեղի կունենա պանելային քննարկում՝ նվիրված արցախցիների նկատմամբ ատելության խոսքի և խտրական վերաբերմունքի դրսևորումներին. Արցախի հանրային խորհուրդ

Արցախի Հանրապետության Հանրային Խորհուրդը հայատարարություն է տարածել.

«Հարգելի՛ լրագրողներ և զանգվածային լրատվության միջոցների ներկայացուցիչներ,

Հրավիրում ենք լուսաբանելու:

Սույն թվականի ապրիլի 3-ին՝ ժամը 16։00-ին, ՀՀ-ում Արցախի Հանրապետության ներկայացուցչության շենքում (ք․ Երևան, Նաիրի Զարյան 17/2) տեղի կունենա Արցախի հանրային խորհրդի կողմից կազմակերպված պանելային քննարկում՝ նվիրված արցախցիների նկատմամբ ատելության խոսքի և խտրական վերաբերմունքի դրսևորումներին, այդ համատեքստում անձանց նկատմամբ հետապնդումներին, ինչպես նաև արցախցիների վերադարձի իրավունքի շուրջ խոսույթին։

Միջոցառման նպատակն է բարձրացնել իրազեկվածությունը վերոնշյալ խնդիրների վերաբերյալ, քննարկել դրանց ազդեցությունը մարդու իրավունքների պաշտպանության, հասարակական բևեռացման և հանրային միջավայրի վրա, ինչպես նաև անդրադառնալ արցախցիների անվտանգ և արժանապատիվ վերադարձի շուրջ խոսույթին՝ հաշվի առնելով այն մարտահրավերները, որոնց բախվում են այդ հարցի շուրջ հանրային և իրավապաշտպան գործունեություն ծավալող անձինք և կազմակերպությունները։

Քննարկմանը ներգրավված են ոլորտի փորձագետներ և իրավապաշտպաններ՝ Գեղամ Ստեփանյանը, Նարե Սիմոնյանը, Հովհաննես Խուդոյանը և Լարիսա Ալավերդյանը:

Միջոցառմանը հրավիրված են նաև քաղաքացիական հասարակության և միջազգային կազմակերպությունների ներկայացուցիչներ»։