Հայաստանի առավելություններից մեկը՝ որակյալ ու էժան աշխատուժ. Կարեն Մկրտիչեան

Այսօր խորհրդարանում լսումներ են կազմակերպվել՝ «Հայաստանի արտաքին քաղաքականության տնտեսական բաղադրիչը» թեմայով, որին մասնակցում են ՀՀ վարչապետ Կարեն Կարապետյանը, ԱԺ պատգամավորներ, բիզնես սեկտորի ներկայացուցիչներ, Հայաստանում միջազգային ընկերությունների ներկայացուցիչներ, դիվանագետներ:

Ելույթով հանդես եկավ տնտեսական զարգացման և ներդրումների նախարար Սուրեն Կարայանը` խոսելով ներդրումների ներգրավման, դրանում Հայաստանի զարգացման հիմնադրամի դերի մասին, որ հիմնադրամը հանձն է առնում մինչև գործունեության մեկնարկն աջակցել ներդրողներին:

Հայաստանի զարգացման հիմնադրամի տնօրեն Կարեն Մկրտիչեանը ելույթում նշեց, որ Հայաստանի զարգացման հիմնադրամի նպատակն է խթանել ներդրումները, արտահանումը, զբոսաշրջությունը:

«Ճիշտ է, Հայաստանը ծով չունի, բայց ներդրողներին տալիս է իրական առավելություններ, մակրոտնտեսական և ֆինանսական ոլորտի կայունություն, զանազան ներդրումային հնարավորություններ զանազան ոլորտներում՝ տուրիզմ, տնտեսություն և այլն: Ունենք որակյալ ու համեմատաբար էժան աշխատուժ, ունենք հնարավորություն դուրս գալու ԵՏՄ շուկա, Իրանի շուկա»,- ասաց նա՝ օրինակ բերելով մի օտարերկրյա ներդրողի, ով Հայաստանում սառեցված պիցցա է արտադրում ու այն արտահանում Ռուսաստան ու Իրան: Որպես առավելություն` հիմնադրամի տնօրենը մատնանշեց պետության կամքը՝ նեցուկ լինել գործարար միջավայրին: Նա նշեց նաև, որ Հայաստանի զարգացման հիմնադրամն անգամ հանձն է առնում սպասարկել ներդրողին հետներդրումային ժամանակահատվածում: