Եկեք զբաղվենք մեր հայրենիքի շենացմամբ. Լևոն Մարտիրոսյանը՝ Զարուհի Փոստանջյանին

Այսօր ԱԺ պետաիրավական հարցերի մշտական հանձնաժողովում քննարկվում էր «Ժառանգություն» խմբակցության ղեկավար Զարուհի Փոստանջյանի հեղինակած` «Գաղտնազերծման /լյուստրացիայի/ մասին» օրենքը:

Զարուհի Փոստանջյանը, ներկայացնելով օրենսդրական նախաձեռնությունը, նշեց, որ «Ժառանգություն» խմբակցությունը ԱԺ չորրորդ գումարման ԱԺ-ին ևս ներկայացրել է այս օրինագիծը, որն այն ժամանակ նույնպես հավանության չի արժանացել: Նախագիծը միտված է բոլոր այն անձանց, ովքեր նախկինում կապ են ունեցել հատուկ ծառայությունների հետ, և դրա մասին հասարակությունը պաշտոնապես չի իմացել:

«Գտնում ենք, որ հատուկ ծառայությունների հետ այդ անձանց կապը կարող է այսօր էլ շարունակվել, և այդ կապի մասին նրանք պետք է հայտնեն: Լինելով Խորհրդային միության երկիր` մենք այդ մարդկանց այն ժամանակ չենք գաղտնազերծել, և մեր խնդիրների մի մասն էլ գալիս է հենց այդտեղից: Բոլոր այն երկրները, որտեղ ընդունեցին այս օրենքը, ավելի դինամիկ սկսեցին զարգանալ»,- ասաց պատգամավորը:

ՀՀԿ-ական Լևոն Մարտիրոսյանը հարցրեց Փոստանջյանին, թե ինչ է հասկանում` լյուստրացիա ասելով, որովհետև, առհասարակ, լյուստրացիան օտար պետությունների գործակալներին բացահայտելու համար է, հիմա Հայաստանը ո՞ր օտար երկրի գործակալներին է ցանկանում բացահայտել: Զարուհի Փոստանջյանը պատասխանեց, որ այդ երկիրը նախկին Խորհրդային միությունն է, որտեղ գործել են հատուկ ծառայություններ:

«Եկեք զբաղվենք մեր հայրենիքի շենացմամբ, այլ ոչ թե անհեթեթություններով»,- արձագանքեց Լևոն Մարտիրոսյանը:

Հարակից զեկուցող` ՀՀԿ-ական Վահրամ Մկրտչյանը նշեց, որ իրավական տեսակետից այս օրենքի նախաձեռնությունը լուրջ հակասություններ ունի օրենսդրության հետ: Նրա խոսքով` բոլորն էլ կողմնակից են, որ օտարերկրյա գործակալները բացահայտվեն, բայց ազգային անվտանգությունում աշխատող ավագ սերնդի կադրերը նույնպես պրոֆեսիոնալներ են եղել, հայրենասեր, ուստի նրանց բացահայտելու կարիք չկա, նրանք հայտնի են:

Կառավարության ներկայացուցիչ` արդարադատության փոխնախարար Սուրեն Քրմոյանը նշեց, որ կառավարության եզրակացությունը օրենսդրական նախաձեռնությանը բացասական է:

Քվեարկությամբ` օրենքի նախագիծը չանցավ օրակարգ: