Ձեզ այդ բարոյական իրավունքը չի տրվել. ՀՀԿ-ականը` Զարուհի Փոստանջյանին

ԱԺ արտաքին հարաբերությունների մշտական հանձնաժողովի նիստում «Լեռնային Ղարաբաղի Հանրապետությունը ճանաչելու մասին» ՀՀ օրենքի նախագծի քննարկման ժամանակ ԱԺ «Ժառանգություն» խմբակցության քարտուղար Զարուհի Փոստանջյանը նշել է, որ այսօր առավել քան կարեւոր է Արցախի Հանրապետության ճանաչումը, որովհետեւ մեր արտաքին քաղաքականության ոլորտի գործողությունները մեծամասամբ պայմանավորված են մեր երկրորդ պետության հետ, եւ որ հատկապես այս հարցը արդիական է դարձել սեպտեմբերի երեքի իրադարձություններից հետո, երբ հայտարարվեց, որ ՀՀ-ն պատրաստվում է անդամակցել Մաքսային միությանը:

Ըստ Փոստանջյանի` ԱԺ-ի խնդիրն է ձեռնամուխ լինել եւ պատրաստակամություն եւ պատվարություն վերցնել` ճանաչելով ԼՂՀ անկախությունը:

« Հիմա կան Մաքսային միության վերաբերյալ քննարկումներ, բայց այդ փաստաթղթերում առկա դրույթները դեռեւս մատչելի չեն հայ հանրությանը, եւ տվյալ պարագայում մենք պետք է ճիշտ կողմնորոշվենք: Դիմում եմ ձեզանից յուրաքանչյուրին` որպես պատգամավոր, որ կողմնորոշվեք ձեր անկախ որոշմամբ, այլ ոչ թե` կուսակցական շահերով»,- ասել է Փոստանջյանը:

Վերջինիս հեգնելով` հարց է տվել ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը. «Այս պատմական օրը ես կուզեմ ձեզ հարց տալ առաջինը. ո՞րն է լինելու այս որոշման հետեւանքը»: Փոստանջյանը վստահեցրել է, որ առաջարկը բխում է մեր երկրի շահերից, քանի որ եթե ՀՀ-ն ճանաչի ԼՂՀ անկախությունը,Արցախը կդառնա բանակցային կողմ: ՀՀԿ-ական Համլետ Հարությունյանն էլ հայտարարեց, որ նրան «բարոյական իրավունք չի տրվել գալ եւ նախագիծը ներկայացնել, մասնավորապես, նրա պահվածքից հետո»:

Պատգամավորը հիշել է ԵԽԽՎ-ում Փոստանջյանի հայտնի հարցը ու ասել, որ չի պատրաստվում մնալ նիստին եւ փորձել է հեռանալ:

Նիստին ներկա պատգամավոր Էդմոն Մարուքյանն առաջարկել է հետաձգել այս նախագծի քննարկումը: