Ես ու վարչապետը թոշակի գնացողը չենք. Գալուստ Սահակյանը՝ Զարուհի Փոստանջյանին

Այսօր ԱԺ արտահերթ նիստում քննարկվում էր ՀՀ պաշտոնաթող նախագահների կենսաթոշակի վճարման, սպասարկման և անվտանգության ապահովման մասին օրենքում փոփոխություններ անելու հարցը:

Արտահերթ ելույթ ունեցավ ԱԺ նախագահ Գալուստ Սահակյանը: Նա նշեց, որ ուշադիր հետևել է բոլոր ելույթներին և տեսել է, որ որոշ պատգամավորներ փորձում են ոչ թե հիմնավորումներ ներկայացնել, այլ սեփական փիլիսոփայությունը: Գալուստ Սահակյանը քննադատեց «ում չեմ սիրում, ուրեմն նա նախագահ չէ» ոճով ելույթները:

«Այս օրենքի փոփոխությունը նախագահի անձին չի վերաբերում, այլ նախագահի ինստիտուտին: Անձնական ամբիցիաները պետք չէ ներկայացնել ԱԺ-ում: Մենք ասում ենք, որ պետության ինստիտուտները պետք է հարգենք, եթե այդպես չանենք` ո՞ր պետությունն է մեզ հարգելու, ո՞ր ժողովուրդն է մեզ հարգելու: Ձեր ասածներից ստացվում է, որ Լևոն Տեր-Պետրոսյանը որևէ դերակատարում չի՞ ունեցել, բա ինչպե՞ս անկախացանք, ինչպե՞ս պատերազմը հաղթեցինք, այս ամենը եղել է, չէ՞: Հումորով ասեմ, որ այդ օրենքը չի կարող վերաբերել ԱԺ նախագահին ու վարչապետին, որովհետև մենք թոշակի գնացողը չենք»,- ասաց Գալուստ Սահակյանը:

Նա նաև հավելեց, որ օրենքը պետք է ընդունվի, քանի որ դա վերաբերում է ոչ թե կոնկրետ նախագահներին, այլ հայ ազգի արժանապատվությանը: