Վարկերի պատճառով տունն առգրավել են, բայց դեռևս թույլատրում են այնտեղ ապրել. մահացած զինծառայողի ընտանիքը` խնդիրների առջև

Տեղեկացրել էինք, որ երեկ սահմանին զինծառայող է զոհվել:  Ըստ քննչական կոմիտեի հաղորդման` 1995թ. ծնված Վարդան Հովհաննեսի Առաքելյանին մահացու վիրավորում է հասցրել կրտսեր սերժանտը:

Վարդան Առաքելյանը Արմավիրի մարզի Արազափ գյուղից էր: Yerkir.am-ի հետ զրույցում Արազափի գյուղապետ  Մանվել Հարությունյանը հայտնեց, որ Վարդան ունի հայր, մայր ու 2 եղբայր:

«Նա միջնեկ տղան էր: Մեծ եղբայրը նույնպես ծառայել էր Ղարաբաղում: Նա ու կրտսեր եղբայրը ծառայում էին Ջաբրայիլում. կրտսեր եղբայրը պետք է հունվարի 17-ին զորացրվեր, իսկ ինքը 4-5 ամիս է, ինչ ծառայում էր: Վարդանի ծառայությունը ձգձգվել էր, քանի որ խնդիր ուներ` ձեռքը կոտրվել էր, և մի քանի տարի բուժվում էր: Երկու եղբայր նույն տեղն էին ծառայում… Եղբայրը եղբորը «տուն բերեց»,- ասաց Հարությունյանը:

Նա նշեց նաև, որ Վարդանի ծնողներն աշխատում  էին, ամեն ինչ անում ու փորձում տունը պահել, սակայն վերջերս ֆինանսական խնդիրներ ունեին: «Տունը վարկի տակ էր: Վարկը չմարելու պատճառով բնակարանն առգրավել են, սակայն դեռևս թույլատրում են նրանց այնտեղ ապրել: Չգիտեմ` ինչ է լինելու»,- ասաց գյուղապետը:

Նա տեղեկացրեց նաև, որ այսօր տեղի կունենա Վարդանի հոգեհանգիստը: