Օրենքի փոփոխությամբ` գրանցման պահին նոր կուսակցությունը պետք է 1000 անդամ ունենա

Այսօր ԱԺ Մարդու իրավունքների և հանրային հարցերի հանձնաժողովում քննարկվեց կառավարության ներկայացրած «Կուսակցությունների մասին» ՀՀ օրենքում փոփոխություններ կատարելու մասին հարցը, որով կդյուրացվեն և կպարզեցվեն կուսակցությունների հիմնադրման և պետական գրանցման հետ կապված հարցերը,  կապահովվեն իրավական երաշխիքները կուսակցությունների պետական գրանցման անհիմն մերժումները բացառելու համար, համալիր իրավական կարգավորում կստանա կասեցման ինստիտուտ, որով կապահովվի վերջինիս գործնական կիրառությունը,  կհստակեցվեն կուսակցությունների գործունեության կասեցման և արգելման արդյունքում առաջացող բացասական հետևանքները,  կստեղծվեն կուսակցությունների գործունեության անխոչընդոտ իրականացման համար հավասար և ոչ խտրական պայմաններ:

Մասնավորապես մտցվում է  պետական գրանցման պահին կուսակցության 1000 անդամ ունենալու պահանջը: Մյուս փոփոխությունն այն է, որ եթե գործող օրենքով կուսակցությունը պետք է տարածքային ստորաբաժանումներ ունենա ՀՀ ողջ տարածքում, ապա փոփոխությամբ առաջարկվում է  ստեղծման պահին կուսակցությունը տարածքային ստորաբաժանում ունենա կամ Երեւանում, կամ մարզերի մեկ երրորդում,  կամ` Երեւանն ու մարզերը միասին վերցրած մեկ երրորդում: Նախագիծը մտավ լիագումար նիստերի օրակարգ: