Կարեն Կարապետյանը երկու փուլով է գործելու

Կառավարության ծրագիրը երեկ ՀՀԿ-ն շատ մանրակրկիտ քննարկել է. ԱԺ-ում լրագրողների հետ զրույցում ասաց ՀՀԿ խմբակցության քարտուղար Վահրամ Բաղդասարյանը:

Խոսելով այն մասին, թե ինչո՞վ է նոր կառավարության այս ծրագիրը տարբերվելու մյուս կառավարությունների ծրագրերից, նա նշեց, որ քայլերն ավելի են կտրուկացել: «Այս ծրագրում լինելու է երկու փուլ: Առաջին փուլը կլինի հիմքերի ստեղծում, դա կարճաժամկետ ծրագիրն է, իսկ երկրորդը հեռանկարային է»,- ասաց պատգամավորը:

Բաղդասարյանի խոսքով` այս ծրագիրը վեցամսյա է, որովհետև գուցե ապրիլից հետո /խորհրդարանական ընտրություններ 2017թ-. խմբ/ լինի նոր իշխանություն:

«Ասենք` իշխանությունը փոխվեց: Կարևոր է, որ նա իր 5-6 տարվա ծրագիրը չփաթաթի հաջորդ կառավարությունների վզին: Դրա համար էլ նոր կառավարությունը ծրագիրը բաժանել է երկու մասի՝ կարճաժամկետ և հեռանկարային«,- ասաց նա` հավելելով, որ ծրագիրը դեռ նախնական փուլում է, և ինքը չի ցանկանում մանրամասն խոսել:

Բաղդասարյանն ավելացրեց, որ երբ կառավարության ծրագիրը ԱԺ-ում ներկայացվի և խմբակցություններում ու հանձնաժողովներում քննարկվի, նոր միայն հնարավոր կլինի մանրամասն խոսել ծրագրի մասին: