Երբ է ի վերջո Երեւանի տրանսպորտային նոր ցանցը գործելու, երբ են նոր ավտոբուսները գործելու. Ներկայացրեց քաղաքապետը

Կոմպակտ դասի ավտոբուսների մատակարարումն արդեն սկսվել է, որոնք կլինեն 100 հատ. 30-ը դեկտեմբերին, 30-ը՝ հունվարին եւ 40-ը՝ փետրվարին: Այս մասին, այսօր դեկտեմբերի 22-ին, Երեւանի ավագանու նիստում նշեց Երեւանի քաղաքապետ Հայկ Մարությանը:

«Հենց այդ ժամանակում էլ մտցնելու ենք գիծ, որովհետեւ հունվարին բավականին շատ գծեր փակվելու են: Այս ավտոբուսները միտված են այդ փակված գծերը չեզոքացնելուն: Ընդհանուր առմամբ, տրանսպորտային ցանցը, որը գծվել է WYG բրիտանական ընկերության կողմից նախատեսում է մոտ 850 շարժակազմ, այնտեղ կան եւ ավտոբուսներ, եւ տրոլեյբուսներ, բայց այդ ցանցը կարող է գործարկվել, երբ ամբողջ շարժակազմը կլինի: Դրա համար նախատեսում ենք անցումային ցանց ունենալ, եւ երբ ամեն անգամ նոր շարժակազմ կգա, կհամալրվի»,-ասաց Մարությանը:

Նա տեղեկացրեց, որ արդեն իսկ մրցույթ է հայտարարվել 8,5 մետրանոց 161 ավտոբուսների համար: «Հունվարի վերջին մրցույթը կբացվի, մատակարարումը կլինի 4-6 ամսվա մեջ: Դրա համար մոտ 7 մլրդ դրամից ավելի գումար է նախատեսվում: Երեւան քաղաքը դա գնելու է իր բյուջեով: Այս 100 կոմպակտ ավտոբուսները եւս գնել ենք մեր բյուջեով: Այս երկուսը միասին կլինի 261, բայց այդ Չինաստանից 9 տարի առաջ նվեր ստացած 249 ավտոբուսները եւս կաշխատեն: Նաեւ 12 մետրանոց 100 հատ ավտոբուսների մրցույթ կլինի, որոնք կլինեն «Եվրո 6» ստանդարտի: Մինչեւ տարվա վերջ այդ մրցույթը կհայտարարվի»,-ընդգծեց քաղաքապետը՝ հավելելով, որ այս վերջին մրցույթի համար կառավարությունը գումար պետք է հատկացնի: