Քննարկումներ են ընթանում առևտրային բանկերի միաձուլման վերաբերյալ

Այսօր լրագրողների հետ են հանդիպել ԿԲ ներկայացուցիչները` ներկայացնելու ԿԲ ֆինանսական շուկայի և գների կայունացման վերաբերյալ տվյալներ: Նրանցից Անդրանիկ Գրիգորյանը նշեց, որ ավանդների մեջ ունեն դրական աճ` թե\' ֆիզիկական անձանց կողմից, թե\' իրավաբանական անձանց կողմից, աճ է արձանագրվել վարկերի մասով, առաջխաղացում կա բանկերի կապիտալի համալրման մասով:

Վահագն Գրիգորյանը նշեց, որ Հայաստանը տոկոսադրույքներն ամենաշատը նվազեցրած երկրների թվում է, մասնավորապես` վերջին մեկ տարվա ընթացքում 9-րդ անգամ է նվազել տոկոսադրույքը: Դրական աճ են  արձանագրում դրամային հիփոթեքային վարկերը:

ԿԲ ներկայացուցիչները վստահեցրեցին, որ բանկերի շահութաբերությունն աճում է:

Հարցին, թե որքա՞ն բանկ կմնա ու կգործի Հայաստանում, նրանք պատասխանեցին, որ թեև կան բանկային գաղտնիքներ, սակայն ներկա պահին ինտենսիվ քննարկումներ են գնում բանկերի միջև միաձուլման ու կապիտալի համալրման հարցով, և շատ շուտով առևտրային բանկերը կհայտարարեն դրա մասին: