Դոտացիաներն առավել համաչափ կբաշխվեն համայնքների միջև

Այսօր ԱԺ արտահերթ նիստում տարածքային կառավարման եւ զարգացման նախարարի առաջին տեղակալ Վաչե Տերտերյանը ներկայացրեց «Համայնքների ֆինանսական համահարթեցման մասին» նախագիծը: Նախագծով առաջարկվում է դոտացիաներն առավել համաչափ բաշխել համայնքների միջեւ:

Ըստ Վաչե Տերտերյանի` 10 տարվա ընթացքում այս գործընթացը հնարավոր է եղել իրականացնել սահուն, և որեւէ դժվարություն չի նկատվել: Համակարգի հիմքում պարզ սկզբունք է՝ դոտացիաները բաշխվել են ըստ մեկ շնչին բաժին ընկնող եկամուտների, ըստ բնակչության թվաքանակի: Առաջարկվում են նաև նոր լուծումներ՝ համայնքները տարբերակել, իդենտիֆիկացնել և դոտացիաների հաշվարկման բազմագործոն համակարգ ձևավորել:

ՀԱԿ խմբակցության անդամ Հրանտ Բագրատյանը հարց ուղղեց փոխնախարարին: «Համայնքների բյուջեի ֆինանսական ռեսուրսները կազմում են 25 տոկոս, մնացածը բերում են Երեւանից՝ դոտացիաների տեսքով: Միգուցե հակառա՞կն անեիք, ու Երեւանից քիչ ստանային: Դուք չեք բերում օրենք, որը բնակչին կպահի համայնքում»,- ասաց նա:

Վաչե Տերտերյանը արձագանքեց, որ նախագծում ոչ մի հակասություն չկա: Նրա խոսքով՝ համայնքների բյուջեները ոչ մի կերպ համադրելի չեն ՀՀ պետական բյուջեից ստանալիք գումարների հետ: Իսկ այս նախագիծը վերաբերում է այսօր բյուջեից տրամադրվող ֆինանսական ռեսուրսներին:

«Հիմնական խնդիրը պետք է դիտվի այն, որ համայնքների սեփական եկամուտները, ցավոք, նույնիսկ համադրելի չեն պետությունից կամ պետական բյուջեից ստացվող դոտացիաների հետ, սա հիմնախնդիր է, որը կա և այս օրենքի խնդիրը չէ։ Բյուջեի մասին օրենքով դեռևս որևէ անգամ դա իրագործելու այդպիսի հնարավորություն չենք ունեցել։ Այս օրենքի նախագիծը վերաբերում է այսօր պետական բյուջեից համայնքներին տրամադրվող ֆինանսական ռեսուրսների վերաբաշխմանը: Համահարթեցման սկզբունքով տրվող ռեսուրսները բավական մեծ ծավալ են կազմում: Համահարթեցման մասին օրենքը, ավելի բազմագործոն է դարձնում համայնքների միջև ռեսուրսի բաշխումը»,- ասաց Տերտերյանը: