«Աջակցենք Արցախին» ծրագրի շրջանակներում Եկեղեցու թեմերում նվերներ կբաշխվեն արցախցի 18 000 երեխայի

Ն․Ս․Օ․Տ․Տ․ Գարեգին Երկրորդ Ծայրագույն Պատրիարք եւ Աﬔնայն Հայոց Կաթողիկոսի տնօրինությամբ հաստատված Մայր Աթոռ Սուրբ Էջմիածնի «Աջակցենք Արցախին» ծրագրի շրջանակներում համակարգող հանձնախումբը՝ ատենապետությամբ Արեւմտյան Եվրոպայի Հայրապետական պատվիրակ Գերաշնորհ Տ. Խաժակ արքեպիսկոպոս Պարսամյանի, օրերս արդեն ձեռնամուխ է եղել մի շարք հունամիտար ձեռնարկների իրականացմանը։

Մայր Աթոռի Սոցիալական ծառայությունների գրասենյակի միջոցով Արարատյան հայրապետական թեմի Արարատի հոգեւոր տեսչությունում,  Շիրակի, Գուգարքի եւ Արմավիրի թեմերում պարենային սննդի եւ հիգիենիկ պարագաների աջակցություն է ցուցաբերվել Արցախից տեղահանված 205 ընտանիքի։ Աջակցությունը կտրամադրվի առաջիկա չորս ամիսներին եւ կընդգրկի նաեւ Հայաստանում ապաստանած այս ընտանիքների կոմունալ վարձերի վճարումը։

Ամանորի եւ Սուրբ Ծննդյան տոների կապակցությամբ Մայր Աթոռ Սուրբ Էջմիածնի եւ թեմերի կողմից կիրականացվի 250.000 (երկու հարյուր հիսուն հազար) ԱՄՆ դոլարի մեկ այլ ծրագիր, որի շրջանակներում հայաստանյան թեմերում եւ Արցախի թեմում հոգեւոր հովիվների կողմից նվերներ կբաշխվեն Արցախից տեղահանված ընտանիքների, ինչպես նաեւ զոհված եւ վիրավոր զինծառայողների, անհայտ կորած կամ գերության մեջ գտնվող անձանց ընտանիքների 18 000 երեխայի։

Ծրագրին օժանդակելու նպատակով Մայր Աթոռ Սուրբ Էջմիածնում աշխարհասփյուռ թեմերից ստացվել են մի շարք նվիրատվություններ։

Ռուսաստանի եւ Նոր Նախիջեւանի Հայոց թեմից փոխանցվել է 7․350․000 (յոթ միլիոն երեք հարյուր հիսուն հազար) ռուբլի գումար, ԱՄՆ Հայոց Արեւմտյան թեմից՝ 50․000 (հիսուն հազար) ԱՄՆ դոլար, ԱՄՆ Հայոց Արեւելյան թեմից՝ 52․750 (հիսուն երկու հազար յոթ հարյուր հիսուն) ԱՄՆ դոլար, Կանադայի հայոց թեմից՝ 50․000 (հիսուն հազար) ԱՄՆ դոլար, Ավստրալիայի եւ Նոր Զելանդիայի հայոց թեմից՝ 33․000 (երեսուն երեք հազար) ԱՄՆ դոլար եւ Գերմանիայի հայոց թեմից՝ 15․000 (տասնհինգ հազար) եվրո գումար։