«Էներգաիմպէքս» ընկերության ստեղծումը պետք է գնահատել որպես բացառիկ կարևորության նախաձեռնություն. իրանագետ

Իրանագետ Վարդան Ոսկանյանն իր ֆեյսբուքյան էջում անդրադարձել է կառավարության այսօրվա նիստում հաստատված որոշումներից մեկին, ըստ որի` ստեղծվում է ընկերություն, որը  հնարավորություն կընձեռի ավելացնել բնական գազի ներկրումը Իրանի Իսլամական Հանրապետության տարածքից՝ առավել արդյունավետ դարձնելով Իրան-Հայաստան գազամուղի օգտագործումը:

Վարդան Ոսկանյանը մասնավորապես գրել է. «Հայաստանի միջոցով Իրանից գազի արտահանման նպատակ հետապնդող հայկական «Էներգաիմպէքս» ընկերության ստեղծումը պետք է գնահատել որպես բացառիկ կարևորության նախաձեռնություն մեր երկրի տնտեսական և քաղաքական կարգավիճակին բոլորովին նոր որակ հաղորդելու առումով:

Այս քայլով Հայաստանը փաստացիորեն հստակ ազդակ է հղում, որ էներգետիկ ոլորտում չի բավարարվելու միայն բարձրավոլտ էլեկտրական էներգիայի փոխանցման միջանցքի դերակատարություն ստանձնելով, այլ հարևան և բարեկամ Իրանի հետ սերտ փոխգործակցությամբ աստիճանաբար մուտք է գործելու նաև գազային տարանցման շուկա, ինչն, ըստ էության, ոչ միայն բարձրացնելու է մեր էներգետիկ անվտանգությունը, այլև զգալիորեն բարելավելու է Հայաստանի աշխարհաքաղաքական դիրքերը նաև միջազգային ասպարեզում: