Մերկելն ու Էրդողանը հնարավոր է քննարկեն Բունդեսթագի կողմից հաստատված` Հայոց ցեղասպանության բանաձևը

Հուլիսի 8-9-ը Լեհաստանի մայրաքաղաք Վարշավայում տեղի կունենա ՆԱՏՕ-ի անդամ երկրների ղեկավարների երկօրյա գագաթաժողովը:

Թուրքական Hürriyet թերթի կայքի տեղեկացմամբ՝ ակնկալվում է, որ գագաթաժողովի ընթացքում կկազմակերպվի Գերմանիայի վարչապետ Անգելա Մերկելի և Թուրքիայի նախագահ Ռեջեփ Թայիփ Էրդողանի հանդիպումը:

Ըստ Ermenihaber-ի՝ նշվում է, որ Մերկելի և Էրդողանի երկկողմ հանդիպումը կամ գոնե կարճատև զրույցը հնարավոր դարձնելու համար բանակցություններ են տարվում: Աղբյուրն ընդգծում է, որ այս ենթադրյալ հանդիպումը առաջինն է լինելու Գերմանիա -Թուրքիա հարաբերությունների վատթարացումից հետո և կարող է որոշակիորեն մեղմացնել երկու երկրների միջև ստեղծված լարվածությունը:

Հիշեցնենք, որ Գերմանիա-Թուրքիա հարաբերությունները վատթարացել էին հունիսի 2-ին Բունդեսթագի կողմից Հայոց ցեղասպանությունը ճանաչող բանաձևի ընդունումից հետո: Այս համատեքստում Թուրքիան ավելի ուշ արգելել էր գերմանացի պատգամավորներին՝ այցելել Ինջիրլիք ռազմաբազա և տեսակցել գերմանացի զինվորների  հետ:

Էրդողանի հետ հանդիպելու առաջարկը, ըստ թուրքական թերթի, արվել է Անգելա Մերկելի կողմից: Հանդիպման ընթացքում կողմերը կքննարկեն Բունդեսթագի կողմից հաստատված` Հայոց ցեղասպանության բանաձևը:

ՆԱՏՕ-ի գագաթաժողովի ընթացքում նախատեսվում են նաև Էրդողանի մի շարք այլ երկկողմ հանդիպումներ: Թուրքիայի նախագահը առանձնազրույց կունենա ԱՄՆ-ի նախագահ Բարաք Օբամայի հետ: Հանդիպման ընթացքում կքննարկվեն Սիրիայի, Իրաքի խնդիրներին, ահաբեկչության դեմ պայքարին առնչվող հարցեր: