Տեսնում են ինձ անվասայլակով տնտեսական գործունեություն ծավալելիս, ավելի են ոգևորվում

Տավուշի մարզի Այրում քաղաքում հաշմանդամների «Դեբեդ» բարեգործական-հասարակական կազմակերպությունը ծավալում է ոչ միայն բարեգործական, այլ նաև տնտեսական գործունեություն: Yerkir.am-ի հետ զրույցում «Դեբեդ» բարեգործական ՀԿ-ի նախագահ Սասուն Աղայանը նշեց, որ հասարակական կազմակերպությունը գործում է  2011-ից, նյութական աջակցություն են ցուցաբերում սոցիալապես անապահով հաշմանդամներին, ուղարկում նրանց հանգստյան տներ, առողջարաններ, խաղալիքներ են բաժանում շրջակա գյուղերի մանկապարտեզներին և այլն:

«Վերջերս զբաղվածության ծրագրի շրջանակներում իրականացրել ենք ճագարաբուծության թեմայով դասընթացներ, ստեղծել ենք փոքր տնտեսություն, քաղաքապետը տարածք է տրամադրել, որտեղ էլ պահում ենք ճագարներ, հավեր: Ունենք  5 աշխատող»,- ասաց Սասուն Աղայանը` հավելելով, որ կարողանում են փաստացի օգնել 5 աշխատողի` նրանց ապահովելով աշխատանքով ու աշխատավարձով:

Նա անգամ վստահ է, որ թեև ներկա պահին վնասով են աշխատում, բայց դա չի կարող իրենց կանգնեցնել, ընդհակառակը` ամեն ինչ անելու են` տնտեսությունն էլ ավելի ընդլայնելու համար:

«Մենք` հաշմանդամներս, չունենալով հարթակ հասարակության մեջ ինտեգրվելու համար, դեռ ոգևորում ենք շատերին: Տեսնում են ինձ անվասայլակով տնտեսական գործունեություն ծավալելիս, մարդիկ ավելի են ոգևորվում»,- ասաց Սասուն Աղայանը:

Նրա խոսքով` Այրումում առանցքային խնդիրը աշխատատեղի բացակայությունն է և մարդկանց սոցիալ-տնտեսական վատ վիճակը: