Գեներալ Չիլինգարյանն ու երկու գնդապետերը կալանավորվեցին

Երեկ երեկոյան դատարանը բավարարել է ՀՀ քննչական կոմիտեի զինվորական քննչական գլխավոր վարչության ՀԿԳ քննության վարչության քննիչի միջնորդությունը և խափանման միջոց կալանավորում կիրառել ՀՀ զինված ուժերի սպառազինության վարչության պետ, գեներալ-մայոր Մելս Չիլինգարյանի, գնդապետեր Արմեն Մարգարյանի և Մհեր Պապյանի նկատմամբ: Այս մասին Yerkir.am-ին հայտնեց ՀՀ քննչական կոմիտեի նախագահի խորհրդական Սոնա Տռուզյանը:

Հիշեցնենք, որ զինված ուժերի կարիքների համար տարբեր ապրանքատեսակների գնման գործընթացում արձանագրված չարաշահումների դեպքերի առթիվ հարուցված քրեական գործերի քննությամբ ձեռք բերված ապացույցների համակցությամբ՝ երեկ` հունիսի 2-ին, գեներալ-մայոր Մելսիկ Չիլինգարյանին եւ գնդապետեր Արմեն Մարգարյանին եւ Մհեր Պապյանին մեղադրանքներ են առաջադրվել պաշտոնեական դիրքը չարաշահելու համար, ինչն առաջացրել է ծանր հետեւանքներ։ Մասնավորապես՝ Մ.Չիլինգարյանին եւ Ա.Մարգարյանին մեղադրանք է առաջադրվել ՀՀ քրեական օրենսգրքի 375-րդ հոդվածի 2-րդ մասով, Մ.Պապյանին՝ ՀՀ քրեական օրենսգրքի 375-րդ հոդվածի 3-րդ մասով։

Գործի նախաքննությունը շարունակվում է: