ՀՀ ուսումնական համակարգը դեռևս պատրաստ չէ վարկանիշավորման. ԿԳ նախարար

ԿԳ նախարար Լևոն Մկրտչյանի կարծիքով` ՀՀ ուսումնական համակարգը` բուհական և հանրակրթական, դեռևս պատրաստ չէ վարկանիշավորման: Այսօր նա լրագրողներին ասաց, որ վարկանիշավորումն ինքնագնահատման վրա է հիմնված, և այն կայացած համակարգերի մեջ է տեղի ունենում, չափանիշներն էլ հասարակության համար շատ ընկալելի և հասկանալի պետք է լինեն:

«Վարկանիշավորումը, այնուամենայնիվ, լավ գործընթաց է, որովհետև մենք աստիճանաբար սովորում ենք վարկանիշավորման գործընթացին, համալսարանները, անգամ` դպրոցները փորձում են ինչ-որ խնդիրներ կարգավորել` հաջորդ տարվան նախապատրաստվելով: Եթե կարողանանք այնպես անել, որ 4-5 տարվա մեջ հավատարմագրումն ու վարկանիշավորումը սկսեն էապես ազդել որակի ձևավորման գործընթացի վրա, խնդիրը լուծված կլինի»,- ասաց նախարարը:

Ներկայումս գործող վարկանիշավորման ձևաչափը Մկրտչյանի համար հիմնավոր չի թվում, բայց ոչ թե նրա համար, որ այն վատ է կատարվում, այլ այն պատճառով, որ դեռևս ժամանակ է պետք, որ համակարգը ադապտացվի այդ ձևաչափին: