ՀՀ Սահմանադրությունը չի արգելում, որ մարդն ունենա մոնոպոլ դիրք. Վարդան Այվազյան

ԱԺ ՀՀԿ խմբակցության պատգամավոր, տնտեսական հարցերի մշտական հանձնաժողովի նախագահ Վարդան Այվազյանը չի պատրաստվում մեկնաբանել վարչապետի ասածները, բայց կարող է ասել իր անձնական և որպես համապատասխան հանձնաժողովի նախագահի տեսակետը: Այսօր լրագրողներին նա ասաց, որ եթե բյուջետային համակարգի կրճատման մասին ենք խոսում, թվերով պետք է լինի ու հստակ:

«Ցանկացած հայտարարություն ապացուցվում է իրականացվող քայլերով, եթե համապատասխան քայլեր չլինեն, կլինեն նաև համապատասխան գնահատականներ: Վարչապետն արձանագրեց պահի լրջությունը և քայլերի հստակությունը: Այս պահին կա ներկա լուրջ իրավիճակ, մարտահրավեր, մենք թևակոխել ենք մի փուլ, որտեղ չունենք տնտեսական հաջողություններ, համախմբվածություն: Ես ասում եմ, որ պետք է պատասխանատվության ենթարկվեն այն մարդիկ, ովքեր արժանի են: Շատ դեպքերում, երբ դուք թացը չորի հետ եք խառնում, պատասխանատվություն կրող անձին դարձնում եք անդեմ»,- ասաց Այվազյանը:

Հարցին, թե ի՞նչ գործնական քայլեր պետք է հաջորդեն Հովիկ Աբրահամյանի այս հայտարարությանը, նա պատասխանեց. «Պետք է լինեն հստակ քայլերով, հստակ թվերով: Եթե խոսում ենք բյուջետային ծախսերի կրճատման մասին, պետք է ասենք, որ այս ոլորտում աշխատողներից այ էսքան կրճատվել ա: Մենք անցել ենք բյուջետային ծրագրավորում հասկացություն, որ շատ նոր է: Ասում ենք` եթե ՓՄՁ-ին վարկ ես տվել, դու ինձ կոնկրետ պատասխանի, քանի ՓՄՁ է աշխատել, քանի աշխատողով, ինձ մի ասա` ում ինչքան ես տվել, ինչքան փող է դուրս գնացել, ներս եկել: ՓՄՁ-ին փող ես տվել, ինձ ցույց տուր երկու տարուց կամ մի տարուց հետո քանի ՁՄՁ է աշխատում, ոչ թե վարկ տվեցիր, հինգ օր աշխատեց, հետո թողեցին, գնացին»:

Անդրադառնալով հակամենաշնորհային գործընթացին` Այվազյնաը կարծիք հայտնեց, որ այստեղ համախմբված աշխատանք է հարկավոր իրականացնել: «Առաջին ջութակի գործողությունը պատկանում է Տնտեսական մրցակցության կոմիտեին, որովհետև էդ մարմինը կոչված է կոնկրետ գործեր իրականացնել: Դրա հետ պետք է աշխատի էկոնոմիկան, պետեկամուտներ»,- ասաց ՀՀԿ-ականը` հավելելով, որ ՀՀ Սահմանադրությունը չի արգելում, որ մարդն ունենա մոնոպոլ դիրք:

«Մենք հստակ գրել ենք օրենքի մեջ և ասում ենք, որ չարաշահումն ենք արգելում: Հենց շուկայում ապրանքդ բարձրացրեցիր, ես քեզ կպատժեմ, կամ էլ եթե գործընկերոջդ հետ պայմանավորվեք, որ երկուսդ էլ գինը բարձրացնեք, որ բռնեցի, կպատժեմ և այլն»,- ասաց նա: