Բարեբախտաբար, էդ ընթացքում մենակ ես եմ վիրավորվել. Հայկ Բադալյան

Ժամկետային զինծառայող Հայկ Բադալյանը Ստեփանակերտի զինվորական հոսպիտալ է տեղափոխվել Մարտակերտից: Նա առաջնագծում ստացել է բեկորային վիրավորումներ:  Yerkir.am-ի հետ զրույցում Բադալյանը պատմեց` ինչպես է վիրավորվել:

«Ապրիլի 25-ի լույս 26-ի գիշերն եմ վիրավորվել, մոտավորապես չորսի սահմաններում: Վիճակը շատ խառն էր, շատ էին կրակում: Ինձանից մոտ երկու մետր հեռավորության վրա ականանետի արկը պայթեց, ու ես վիրավորվեցի»,- պատմեց Հայկը, ապա հավելեց, որ իրեն անմիջապես տարել են հոսպիտալ:

Ուշագրավ է, որ Հայկը յուրօրինակ հանգստությամբ ասաց`լավ է` գոնե այդ ընթացքում միայն ինքն է վիրավորվել: «Բարեբախտաբար, էդ ընթացքում մենակ ես եմ վիրավորվել: Ինձ անմիջապես տարան Մարտակերտի հոսպիտալ, աջ թևիս բեկորն ընդեղ հանեցին, մնացածն էլ ստեղ`Ստեփանակերտում: Միանգամից նույն օրը բերել են ստեղ»,- ասաց նա:

Հայկը հպարտությամբ հիշեց Մարտակերտում արիաբար զոհված Արմենակ Ուրֆանյանին, Ռոբերտ Աբաջյանին, Քյարամ Սլոյանին, Անդրանիկ Զոհրաբյանին և ցանկություն հայտնեց, որ նրանց սխրանքը միշտ հիշվի: Նրա խոսքով`սահմանը պահպանող զինվորների տրամադրվածությունը մարտական է: «Պետք եղավ` մինչև վերջ էլ կգնանք, մեզ ոչ մի բան էլ չի խանգարի»,- ասաց Հայկը:

Նա պատմեց նաև, որ 16 ամիս է, ինչ ծառայում է, Մասիսից է, ունի տատիկ, պապիկ, հայր, մայր, իրենից մեկ տարով փոքր եղբայր և քույր: