Բելառուսը պատրաստ է քննարկել իր ռազմական նոր դոկտրինի վերաբերյալ Հայաստանի մտահոգությունը

Բելառուսը պատրաստ է քննարկել իր ռազմական նոր դոկտրինի վերաբերյալ ՀԱՊԿ գործընկերների մտահոգությունը, սակայն կողմնորոշվելու է իր ազգային շահերով. այսօր, ըստ РИА Новости-ի, հայտարարել է Բելառուսի փոխարտգործնախարար Վալենտին Ռիբակովը:

Ավելի վաղ Հայաստանի ԱԳՆ-ն մտահոգություն էր հայտնել Բելառուսի ռազմական նոր դոկտրինի վերաբերյալ, քանի որ փաստաթուղթն արգելում է բելառուսական բանակի մասնակցությունը արտերկրյա զինված գործողությունների: Փաստաթուղթն առաջին ընթերցմամբ ընդունվել էր Բելառուսի խորհրդարանի ստորին պալատի կողմից ապրիլի սկզբին: 

«Ցանկացած փաստաթուղթ կարելի է քննադատել, նույնիսկ` գուցե Աստվածաշունչը... Մենք ամեն ինչ անում ենք, որպեսզի պաշտպանենք մեր ազգային շահերը: Եթե դա ինչ-որ մեկին դուր չի գալիս, մենք միշտ պատրաստ ենք քննարկել նրանց մտահոգությունը, փնտրել ինչ-որ փոխզիջում»,- ասել է Ռիբակովը` հավելելով, որ իրենց ռազմական նոր դոկտրինը պաշտպանական բնույթ ունի: