Հրազդանի` բարձր ճնշման բալոնների գործարանը գնած ՍՊԸ-ն մաքսային արտոնություններ կստանա

Կառավարության վաղվա նիստի օրակարգում էկոնոմիկայի նախարարությունը ներկայացրել է որոշում` գերակա ոլորտում իրականացվող ներդրումային ծրագրի շրջանակներում ներմուծվող տեխնոլոգիական սարքավորումները, դրանց բաղկացուցիչ ու համալրող մասերը, հումքը և նյութերը ներմուծման մաքսատուրքից ազատելու արտոնությունից օգտվելու համար «Գրանտ» ՍՊԸ կողմից ներկայացված հայտը բավարարելու մասին:

«Գրանտ» ՍՊԸ ձեռք է բերել Հրազդանի` բարձր ճնշման բալոնների գործարանը և սկսել է վերականգնողական աշխատանքներ:

Ավտոմեքենայի բարձր ճնշման բնական գազի բալոնների արտադրման համար որպես հումք օգտագործվում է 34CrMo4 մակնիշի լեգերացված պողպատից պատրաստված անկար, տաք գլանման եղանակով ստացված խողովակները:

Արտադրանքի հումքը՝ խողովակը ընկերությունը ներկրում է Չինաստանից, քանի որ ԵԱՏՄ երկրներում 34CrMo4 մակնիշի պողպատյա խողովակ չի արտադրվում, իսկ դրան քիմիական բաղադրությամբ մոտ խողովակները, որոնք արտադրվում են Ռուսաստանում, իրենց մեխանիկական և այլ հատկանիշներով զգալիորեն զիջում են Չինաստանում արտադրված խողովակներին, որոնք ընդունված են միջազգային ISO 11439:2000 և EN 10297-1:2003 (European Standards) ստանդարտներով:

Արտոնության առկայությունը լուրջ խթան կհանդիսանա նոր ներդրումային ծրագրերի իրականացման և որպես հետևանք նոր աշխատատեղերի ստեղծման, ներդրումների ներգրավման, տեղական արտադրության և արտահանման խթանման համար: