Հրազդանի ցեմենտի գործարանը կփորձի «ոտքի կանգնել»

Այսօր կառավարության նիստում ՀՀ էկոնոմիկայի նախարար Կարեն Ճշմարիտյանը ներկայացրեց որոշում, ըստ որի` «Հրազդան ցեմենտ» ՓԲԸ-ին առաջարկվում է հարկային և պարտադիր սոցիալական ապահովագրության վճարների գծով արտոնություններ տալ` «Հրազդան ցեմենտ» ՓԲԸ-ին հարկային ու պարտադիր սոցիալական վճարների գծով պարտավորություններից ազատել, որը կազմում է 510 միլիոն դրամ:

Նախագծի ընդունման անհրաժեշտությունը պայմանավորված է «ՀՐԱԶԴԱՆ-ՑԵՄԵՆՏ» փակ բաժնետիրական ընկերության (այսուհետ` Ընկերություն) բնականոն գործունեության ապահովմամբ, մասնավորապես` ընկերության հարկային և պարտադիր սոցիալական ապահովագրության վճարների գծով առաջացած տույժերից ազատման միջոցով:

Համաշխարհային ֆինանսատնտեսական ճգնաժամի տարիներին հանրապետությունում շինարարության տեմպերի կտրուկ անկման հետևանքով ընկերության աշխատանքն ընթացել է անկայուն ռիթմով, հաճախակի ընդհատումներով, ինչը բացասական ազդեցություն է ունեցել ընկերության ֆինանսատնտեսական գործունեության վրա` արդյունքում առաջացնելով ֆինանսական պարտավորություններ:

Կարեն Ճշմարիտյանը հիշեցրեց, որ այդ ընկերությունը հանրապետությունում մեծությամբ երկրորդ` ցեմենտ արտադրող կազմակերպությունն է: VTB բանկը 4,6 միլիոն դոլարի վարկային համաձայնություն է տվել, որպեսզի վերագործարկեն ընկերությունը և արտադրեն տարեկան 200 հազար տոննա ցեմենտ` ապահովելով 450 աշխատատեղ:

«Նշեմ նաև, որ ընկերությունը 2015թ.  հարկային պարտավորությունների մասով վճարել է 151 միլիոն դրամ, և 180 միլիոն դրամ վճարել են աշխատավարձերի պարտքերը»,- ասաց նախարարը՝ հավելելով, որ ընկերությունը նորից կսկսի աշխատել և իրացումը կկատարի արտահանման ձևով: