Շփման գծում ստեղծված իրավիճակի կապակցությամբ այսօր որոշակի արձագանք կլինի Վիեննայից

ԱԺ ՀՀԿ խմբակցության ղեկավար Վահրամ Բաղդասարյանն այսօր խորհրդարանում լրագրողներին ասաց, որ սահմանին տիրող իրավիճակը մեր հսկողության տակ է:

«Ագրեսիայի հետ կապված` պետք է ասեմ, որ մենք սպասում ենք միջազգային հանրության արձագանքին և կոչ ենք արել ոչ միայն Մինսկի խմբի համանախագահներին, այլ նաև միջազգային հանրությանը, որ իրական գնահատական տրվի ահաբեկիչներին, հակառակ դեպքում` մեր բանակը մարտունակ է և պատրաստ ցանկացած պատասխան տալու: Համոզված եմ, որ թշնամին կկրի անդառնալի կորուստներ»,- ասաց Բաղդասարյանը և հավելեց, որ այն ստահոդ ինֆորմացիան, որ ադրբեջանական կողմը տարածում է, բնականաբար, իրականությանը չի համապատասխանում` ճիշտ հակառակ պատկերն է:

«Իրենց սոցիալական և տնտեսական ծանր վիճակից հանրության ուշադրությունը շեղելու համար զինվորների արյան գնով նման բան են անում. մի թիզ հողը փոխում են հարյուրավոր զինվորների արյան հետ և այդ մոլոցքով են տառապում, որպեսզի սեփական հանրությանն ինչ-որ բան ներկայացնեն»,- ասաց պատգամավորը:

Yerkir.am-ի դիտարկմանը, թե ԵԽԽՎ նախագահ Պեդրո Ագրամունդը հանդես է եկել ոչ հայանպաստ հայտարարությամբ և բոլորովին էլ Ադրբեջանին չի համարում մեղավոր, Բաղդասարյանը պատասխանեց. «Բնականաբար, մենք գոհ չենք այդ հայտարարություններից և բոլորին ասում ենք, որ հավասարության նշանը պետք է հանվի և մատնացույց արվի` ով է իսկական ագրեսորը, ահաբեկիչը: Այսօր Վիեննայում պետք է ավարտվի Մինսկի խմբի համանախագահների հանդիպումը, և այդ շրջանակներում որոշակի արձագանքներ կլինեն»: