Իշխանությունները չպետք է անընդհատ կուլ գնան Ռուսաստանին. Հրանտ Բագրատյանը՝ գազի գնի մասին

Այսօր ՀԱԿ խմբակցության պատգամավոր Հրանտ Բագրատյանն անդրադարձավ գազի գնի նվազեցման հարցին: Հիշեցնենք, որ վարչապետ Հովիկ Աբրահամյանը, օրեր առաջ խոսելով ՌԴ վարչապետի՝ Հայաստան կատարելիք այցի մասին, նշել էր, որ այդ այցի ընթացքում քննարկվելու է Հայաստանում սպառողի համար գազի գնի նվազեցման հարցը:

Հրանտ Բագրատյանը նշեց, որ Հայաստանում 165 դոլար չէ գազի գինը, այլ` 335 դոլար: Հայաստանի պարագայում «Գազպրոմ»-ն է թե\' գազ ուղարկողը, թե\' գազ ստացողը:

«Հիմա ինձ հետաքրքրում է, որ սպառողի համար 335 դոլարից իջնի գազի գինը:  Աշխարհով մեկ գազի գներն իջնում են, գազամուղը գազամուղի հետևից են կառուցում: Այսօր գազի շուկան դարձել է մատակարարի շուկա, ոչ թե` սպառողի: Գազի համաշխարհային գինն այսօր 80 դոլար է, ուրեմն Հայաստանի համար մի քիչ չպե՞տք է իջնի: Մենք պետք է ազատորեն որոշենք, որ գազային տրանզիտը մեր տարածքով թողնում ենք, չէ՞ որ Հայաստանը գազային ու նավթային խաչմերուկում է գտնվում, հո չե՞նք գնալու` մեռնենք: Իսկ մենք անընդհատ վախենում ենք, որ կարող է զայրացնենք մեր ռազմավարական դաշնակցին՝ Ռուսաստանին: Կարող է Ռուսաստանը զայրանա ու փոշմանի Հայաստանի իշխանությունը պահելու առումով, բայց Ռուսաստանը չի կարող զայրանալ ժողովրդի շահի վրա: Մենք անընդհատ կուլ չպետք է գնանք Ռուսաստանի շահերին: Ուրեմն մենք պետք է ճիշտ բացատրենք մեր շահերը Ռուսաստանին: Եթե 2013-ին ինձ ընտրեիք Հայաստանի նախագահ, ես նոր գազամուղով Հայաստանով գազ կանցկացնեի Իրանից դեպի Եվրոպա»,- ասաց Հրանտ Բագրատյանը: Նրա խոսքով՝ աշխարհում գազ ունեցող  երեք խոշոր երկրներն են Իրանը, Ռուսաստանն ու Քաթարը: