Արագածոտնի մարզպետի մոտ կայացավ քաղաքացիների ընդունելություն

Մարտի 18-ին մարզպետ Գաբրիել Գյոզալյանի մոտ կայացավ քաղաքացիների ընդունելություն: Նախապես հերթագրված էր 28 քաղաքացի, սակայն ընդունելության եկած քաղաքացիրեների թիվն ավելին էր: Մարզի ղեկավարին բնակիչները դիմեցին ամենատարբեր հարցերով, որոնք առնչվում էին բուժօգնության, բնակարանի վերանորոգման, սոցիալական, աշխատանքային, դրամական աջակցության եւ անձնական այլ խնդիրների:

Լսելով քաղաքացիներին` Գաբրիել Գյոզալյանը մանրամասնորեն հետաքրքրվեց նրանց մտահոգող հարցերով, անհրաժեշտ պարզաբանումներ կատարեց, դրանց լուծման համար համապատասխան հանձնարարականներ տվեց: Դիմումատուներից 16-ը ստացան դրամական աջակցություն: Քաղաքացիների ընդունելությունների կազմակերպման կարգի համաձայն` մարզպետի մոտ ընդունելություն կկայանա յուրաքանչյուր ուրբաթ օր:

Գաբրիել Գյոզալյանը միաժամանակ կայցելի շրջաններ եւ տեղերում կընդունի քաղաքացիներին: Դա մարզի ամենահեռավոր համայնքների բնակիչներին եւս հնարավորություն կտա, առանց երկար ճանապարհ անցնելու, հանդիպելու մարզի ղեկավարի հետ եւ նրան ուղղելու իրենց մտահոգող հարցերը:

ՀՀ Արագածոտնի մարզպետարանի տեղեկատվության եւ հասարակայնության հետ կապերի բաժին