Փաշինյանը մեր ախպերն ա, բայց ուզում ա ցույց տա, որ մերը չի. Սամվել Ալեքսանյան

ՀՀԿ խմբակցության պատգամավոր Սամվել Ալեքսանյանն այսօր խորհրդարանում, պատասխանելով լրագրողների հարցին, թե ինչո՞ւ են մարդիկ կարծում, որ հարկերից խուսափելու համար թաքցնում է, որ իրականում ինքն հենց շաքարավազ է ներկրում, ասաց. «Նիկոլ Փաշինյանը հիմա ինքն իրա թեման բռնել ա` օդից կախված, ու ես մտածում եմ, որ ինքը մեր հետ ա ու ուզում ա ցույց տա, որ մեր հետ չի, ես էլ օդից կախված էդ ձև եմ ասում»:

Հարցին` կարո՞ղ եք Ձեր ասածն ապացուցել, նա պատասխանեց, որ Փաշինյանն էլ չի կարողանում իր ասածներն ապացուցել: «Ինքը կարո՞ւմ ա ապացուցի, որ ես պատրաստի հումք եմ բերում: Եթե կարում ա, թող ապացուցի: Ինքն ասում ա օդից կախված լուրերով: Հենց գործարանը խոդ տվեցինք, աշխատացրեցինք, ես ձեզի կհրավիրեմ, ավտոբուս կբերեմ, կգաք, կտեսնեք: Որ շաքարի գործարանը աշխատի, տարին 200-300 տոննա ա լինելու: Մենք էդքան շուկա չունենք Հայաստանում: Մի չորս ամիս ա մոտավորապես աշխատում: Մայիսից կվերագործարկվի երևի: Մեկումեջ արտահանում ենք նաև Վրաստան»,- ասաց պատգամավորը և հավելեց. «Բնական ա, ընտրություն ա դեմներս, Նիկոլ Փաշինյանը պետք ա գա մեր համայնք, իրար հետ ընտրություն անենք: Ինքը մեր ախպերն ա, բայց ուզում ա ցույց տա, որ ինքը մերը չի»:

Ի դեպ, Ալեքսանյանը նշեց նաև, որ երկու նավով են աշխատում, 30 հազար տոննա հումքը եկել է Բրազիլիայից, երկրորդ հումքն էլ պետք է գա: «Հիմա հենց նավը Բրազիլիայից դուրս գա, մոտ մեկ ամսվա ընթացքում խոդ կտանք ու ձեզ էլ կհրավիրենք, կնայեք»,- ասաց նա` հավելելով, որ տարեկան մոտ 80 հազար տոննա արտադրանք է տալիս գործարանը, և որ արդեն հինգ-վեց տարի է առանձին շաքարավազ չեն ներկրում: