Սերժ Սարգսյանի նախորդ ելույթը` Ծառուկյանի մասով, արագ կյանքի կոչվեց. Գառնիկ Իսագուլյան

Նախագահի ելույթն ուղղված էր բոլորին` թե\' ներսի համար էր, թե\' դրսի. այսօր լրագրողներին ասաց «Ազգային անվտանգություն» կուսակցության նախագահ Գառնիկ Իսագուլյանը` անդրադառնալով Սերժ Սարգսյանի վերջին ծրագրային ելույթին: Նրա խոսքով՝ ընդունվել է նոր Սահմանադրություն, որի հետ կապվում էին բոլոր հույսերը, ուրիշ զենք չէր մնացել, որ նրանք արդարացնեին իրենց բոլոր ձախողումները, և հիմա այդ ելույթով փորձում են ասել, որ սկսվում է փոփոխությունների շրջանը:

Գառնիկ Իսագուլյանը բոլորի ուշադրությունը հրավիրում է այն հանգամանքի վրա, որ ուղիղ մեկ տարի առաջ այդ օրը եղավ Սերժ Սարգսյանի հայտնի խորհրդակցությունը, որտեղ նրա ելույթն ուղղված էր ԲՀԿ նախկին առաջնորդ Գագիկ Ծառուկյանին չեզոքացնելուն: Եվ երբ լրագրողներն ասում են, թե Սերժ Սարգսյանի նախորդ ելույթները կյանքի չեն կոչվել, Գառնիկ Իսագուլյանը օրինակ է բերում հենց այդ ելույթը, որն արագ իրագործվեց, և Ծառուկյանին հանեցին քաղաքական դաշտից:

«Լավ կլիներ, որ նախագահի ելույթը մոնիթորինգի տակ վերցնեին բոլորը ու ամեն օր պահանջեին, թե, օրինակ, նախարարությունները ի՞նչ են արել` նախագահի ելույթից ելնելով, արդյո՞ք  նախագահի խոսքը տեղ հասել է, թե՞ ոչ»,- ասաց Գառնիկ Իսագուլյանը: