«Ժառանգություն»-ում Փոստանջյանի թեկնածության` ՄԻՊ պաշտոնում առաջադրման որոշում չեն կայացրել

ՄԻՊ-ի պաշտոնի թեկնածուների շարքում հավանական է համարվում ԱԺ «Ժառանգություն» խմբակցության պատգամավոր Զարուհի Փոստանջյանի թեկնածությունը, որն առաջարկել է ԱԺ պատգամավոր Էդմոն Մարուքյանը: Երեկ էլ ՀՀԿ խմբակցության ղեկավար Վահրամ Բաղդասարյանը խորհրդարանում լրագրողներին ասել էր, որ ՀՀԿ-ում քննարկվում է արդարադատության փոխնախարար Արման Թաթոյանի թեկնածությունը:

Նշենք, որ մինչև փետրվարի 9-ը խորհրդարանական խմբակցությունները ԱԺ պետաիրավական հարցերի մշտական հանձնաժողովին պետք է ներկայացնեն մարդու իրավունքների պաշտպանի` իրենց թեկնածությունները:

Yerkir.am-ը զրուցեց «Ժառանգություն» կուսակցության փոխնախագահ Արմեն Մարտիրոսյանի հետ` տեղեկանալու` Զարուհի Փոստանջյանի թեկնածության  առաջադրման հետ կապված ի՞նչ  նոր զարգացումներ են տեղի ունենում, և արդյո՞ք հավանական համարում է Փոստանջյանի` ՄԻՊ պաշտոնը զբաղեցնելը:

«Մարդու իրավունքների պաշտպանի մասին օրենքը հստակ ասում է, որ ՄԻՊ-ի պաշտոնին կարող է հավակնել այն անձը, ով ճանաչելիություն ունի, հեղինակություն ունի և մարդու իրավունքների պաշտպանության ոլորտում երկարաժամկետ գործունեություն է ծավալել: Բնականաբար, Զարուհի Փոստանջյանն ունի համապատասխան հեղինակություն: Որքան էլ արհեստավարժ լինի պարոն Թաթոյանը, նա մարդու իրավուքների պաշտպանության ոլորտում գործունեություն չի ծավալել և, դժբախտաբար, հանրության մոտ էլ մեծ ճանաչում չունի: Պարզ է, որ քաղաքական գործիչների, պատգամավորների, կառավարության անդամների մոտ  ճանաչում ունի, բայց հասարակության մոտ ակնհայտ է,  որ այդ ճանաչումը չունի»,- նշեց Մարտիրոսյանը:

Ըստ նրա` Զարուհի Փոստանջյանը իրավապաշտպան գործունեություն է անընդհատ ծավալել և իր ողջ հրապարակային գործունեության ընթացքում հենց այդ ոլորտում էլ կայացել է:

«Ժառանգություն»-ը տեսնում է Զարուհի Փոստանջյանին այդ պաշտոնում: Մենք  որոշում չենք կայացրել, բայց  տեսնում ենք իրեն այդ պաշտոնում, և Զարուհի Փոստանջյանն է, որ պետք է որոշումը կայացնի: Կարծում եմ` Զարուհի Փոստանջյանը որոշում ունի, որ առաջադրվի: Ինչքան տեղյակ եմ, ինքը պետք է նաև համապատասխան թղթեր պատրաստեր, որպեսզի առաջադրվեր»,- ընդգծեց կուսակցության փոխնախագահը և հավելեց` երևի  կլինի այն, ինչը սպասելի է, բայց հասարակությունը այլընտրանք պետք է ունենար այս հարցում, և ակնհայտ է, որ Զարուհի Փոստանջյանը  ոչ միայն այլընտրանք է, այլև իրական  թեկնածու:

«Լավ  կլիներ, որ Փոստանջյանի հետ առաջադրվեր, ասենք, Ավետիք Իշխանյանը,  Լարիսա Ալավերդյանը… Այսինքն` մարդիկ, ովքեր, իրենց իրավապաշտպան գործունեությամբ հայտնի են: Այս  պարագայում` միակ իրական  թեկնածուն, որ բոլոր չափանիշներով համապատասխանում է, Զարուհի Փոստանջյանն  է»,-  եզրափակեց Արմեն Մարտիրոսյանը: