Շուշան Պետրոսյանը որևէ պատասխանատվության չի ենթարկվի

ԱԺ էթիկայի հանձնաժողովի անդամ, ՀՀԿ-ական Սուքիաս Ավետիսյանը Yerkir.am-ի հետ զրույցում նշեց, որ իրենց հանձնաժողովում առաջիկա օրերին կքննարկվի այն հարցը, թե ՀՀԿ-ական պատգամավոր Շուշան Պետրոսյանն իսկապե՞ս  «ՀՀ Ազգային ժողովի կանոնակարգ» օրենքով սահմանված էթիկայի նորմերը խախտել է, թե՞ ոչ:

Հիշեցնենք, որ Շուշան Պետրոսյանի` օրեր առաջ կատարած համացանցային գրառումներից մեկը բավական մեծ աղմուկ է բարձրացրել. նա վիրտուալ տարածքում սպառնացել էր հանել օգտատերերից մեկի` Գայանե Շահինյանի աչքերը, ով, ըստ նրա,  վիրավորական խոսքեր էր ասել ՀՀ բանակի, պաշտպանության նախարարի և Հայաստանի հասցեին:

«Եթե մենք ընդհանուրի մեջ ենք նայում, ապա առաջին հերթին պետք է փորձենք պատասխանատվության կանչել էն մարդկանց, որոնք փորձում են «Ֆեյսբուք»-ում ում հասցեին ինչ ասես ասել, երկրորդը` ընդունում եմ, որ եթե պատգամավոր է,  բնական է, որ պետք է ավելի զգույշ լինի իր արտահայտություններում,  բայց երրորդն էլ պետք է ասեմ, որ պատգամավորն էլ է մարդ, և որոշակի հուզմունքներ, էմոցիաներ կան»,- ասաց Ավետիսյանը` հավելելով, որ մեր ժողովրդի մի հատված պարզապես կորցրել է չափի զգացողությունը:

«Հենց այդ մարդկանց առաջին հերթին պետք է կարգի հրավիրել, և  բնական է, որ պատգամավորն էլ իր արտահայտություններում ավելի զգույշ պետք է լինի»,- ընդգծեց նա:

Մեր այն դիտարկմանը, թե Շուշան Պետրոսյանին անձնապես որևէ մեկը չի վիրավորել, մինչդեռ Պետրոսյանն անձնական բնույթի վիրավորանք է հասցրել ֆեյսբուքյան օգտատիրոջը, Ավետիսյանը պատասխանեց. «Բայց ի՞նչ տարբերություն, բարձրաստիճան պաշտոնյայի հասցեին է ասվել: Այսինքն` իրենք կարող են ինչ ասես` ասեն, բայց հենց իրենց են փորձում անձնական վիրավորանք հասցնել, պետք է դառնա էթիկայի հանձնաժողովի քննարկման առարկա՞»:

Նրա խոսքով` պատգամավորի պարագայում պետք է որոշակի չափավորություն լինի, բայց նման դեպքերում պետք է հասկանալ նաև ընդհանուր դրդապատճառը և փորձել նման մարդկանց վարքագիծը կարգավորել: «Վաղ է խոսել այն մասին, թե ինչ որոշում կկայացնի էթիկայի հանձնաժողովը: Մենք պետք է ընդհանուր երևույթը վերլուծենք և հասարակական կարծիք ստեղծենք ընդհանուր երևույթի մասին, նոր կոնկրետ անդրադառնանք պատգամավորի` էթիկայի կանոնների խախտմանը»,- նշեց ՀՀԿ-ական պատգամավորը և հավելեց, որ անգամ եթե որոշվի, որ Շուշան Պետրոսյանն իսկապես խախտել է էթիկայի կանոնները, նա որևէ պատասխանատվության չի ենթարկվի: