Հնարավոր է` տղամարդը, որին ճանկել էր առյուծը, դատական պատասխանատվության ենթարկվի

Տեղեկացրել էինք, որ ուրբաթ երեկոյան Գյումրիի կենդանաբանական այգուց Ուրցաձոր վերականգնողական կենտրոն տեղափոխված առյուծը ճանկել էր մի տղամարդու ուսը: 44-ամյա Արտյոմ Ավետիսյանն Արարատի մարզի Արալեզ գյուղի բնակիչ է, այժմ «Հերացի» համալսարանական հիվանդանոցում է, նրան վիրահատել են:

Yerkir.am-ի հետ զրույցում Վայրի բնության և մշակութային արժեքների պահպանման հիմնադրամի փոխտնօրեն Եվա Մարտիրոսյանը նշեց, որ տղամարդու մուտքն իրենց տարածք եղել է անօրինական, ուստի նա կարող է օրենքով սահմանված կարգով պատասխանատվության ենթարկվել:

«Մենք հասկանում ենք, որ իրավիճակը խոցելի է: Սովորաբար, մեր տարածք մուտք գործելու համար սահմանվում է օրենքով նախատեսված պատիժ, իսկ դա նշանակում է, որ երբ մեր տարածքում հայտնվում է ինչ-որ մեկը, անտառապահներն իրավունք ունեն երկու ժամ պահելու նրան մեզ մոտ և անմիջապես ոստիկանություն կանչելու, որպեսզի մարդն օրենքով սահմանված կարգով ընթացակարգի ենթարկվի: Բայց քանի որ իրավիճակն էքստրաօրդինար էր այդ պահի համար, բնականաբար, խոսք չէր կարող լինել նրան երկու ժամ մեզ մոտ պահելու մասին»,- ասաց մեր զրուցակիցը:

Նա նշեց նաև, որ տղամարդուն պատժելու համար դատական ատյան դիմելու հարցը քննարկման փուլում է: «Մենք մինչ այս չենք դիմել դատական ատյան` հաշվի առնելով գործի` էքստրաօրդինար վիճակը: Դա նույնն է` ինչ մեկը մտնի մասնավոր տարածք, որտեղ ցուցանակների վրա գրված լինի` «Զգուշացեք` տարածքում կծան շուն կա», իսկ մարդն, անտեսելով դա, դարպասի վրայից թռչի այդ տարածք և դեռ մի բան էլ մեղադրի, որ իր վրա հարձակվել են»,- ասաց Մարտիրոսյանը: