Կոռուպցիոն սկանդալ` Ուկրաինայում ՀՀ դեսպանի մասնակցությամբ

Ուկրաինայի պաշտոնանկ արված նախագահ Վիկտոր Յանուկովիչի մտերիմ Վիկտոր Սիվեցի կնոջ շքեղ առանձնատունը դարձել է Հայաստանի դեսպան Անդրանիկ Մանուկյանի նստավայրը. հայտնում է Главком-ը` СorruptUA -ին հղումով: 

Առանձնատան դարպասին «Ուկրաինայում Հայաստանի դեսպանի նստավայր» գրությամբ ցուցանակ է փակցվել: Ընդ որում` սեփականության իրավունքի ռեեստրում չկա տեղեկություն այն մասին, որ շքեղ առանձնատունը վարձով է տրվել: Անշարժ գույքի շուկայի մասնագետների հաշվարկներով՝ առանձնատան միջին գինը 2 մլն 400 հազար դոլար է:  

СorruptUA-ն հարցում է ուղարկել դեսպանատուն՝ մանրամասներ պարզելու համար, սակայն հարցմանը չեն պատասխանել:

Յանուկովիչի իշխանության տարիներին Սիվեցը ղեկավարել է անտառային ռեսուրսների գործակալությունը, և ներկայումս քրեական գործ կա հարուցված` նրա որոշ ապօրինությունների հետ կապված:

Վիեննայի կոնվենցիայի համաձայն՝ դեսպանի նստավայրը, ինչպես նաև դեսպանության տարածքն անձեռնմխելի են: Հետևաբար, Սիվեցն այդ կերպ իրեն պաշտպանում է իրավապահների խուզարկությունից: