Երևանին համոզում են Բաքվին վերադարձնել «գրավյալ» տարածքները. Երևանը հրաժարվում է. Коммерсантъ

«Коммерсант»-ն անդրադարձել է ՌԴ ԱԳՆ ղեկավար Սերգեյ Լավրովի՝ Հայաստան կատարած այցին: Թերթը գրում է, որ Երևանում բանակցությունների առանցքային թեման եղել է ԼՂ հակամարտության խաղաղ կարգավորումը:

Վկայակոչելով բանակցություններին մոտ աղբյուրներ՝ պարբերականը ներկայացնում է խաղաղ կարգավորման  տարբերակներից մեկը, որն այժմ քննարկվում է: Այսպես՝ հայերն Ադրբեջանին են վերադարձնում ազատագրված տարածքների մեծ մասը, սակայն պահում են Լաչինի միջանցքը, որն ապահովում է ՀՀ-ի հետ ԼՂ-ի կապը, նաև հնարավոր է՝ ևս մեկը: Ադրբեջանը, սակայն, պաշտոնապես չի ճանաչում Ղարաբաղի առանձնացումը, բայց, ծրագրի համաձայն, պարտավորվում է հարցը չլուծել  ռազմական ճանապարհով: Դրա երաշխիքը կարող է լինել շփման գծում միջազգային խաղաղապահների տեղակայումը (ՄԱԿ-ի կամ ՀԱՊԿ-ի), ինչպես նաև Ադրբեջանին վերադարձված տարածքների ապառազմականացումը:

Ըստ թերթի՝ Հայաստանի ԱԳՆ-ում աղբյուրի՝ Երևանում հրաժարվում են խոսել որևէ տարածքային զիջման մասին: Աղբյուրը հայտնել է, որ ԼՂՀ-ին կից տարածքների վերադարձը Ադրբեջանի ծրագիրն է, որը նույնիսկ չի քննարկվում: