Հայաստանում համացանցն ավելի ազատ է, քան Թուրքիայում և Ադրբեջանում. Freedom House-ի զեկույցը

Freedom House-ը հրապարակել է ազատ համացանց ունեցող երկրների ցուցակը, որում 18 երկրների հետ տեղ է գտել նաև Հայաստանը:

65 երկրներում համացանցի ազատության աստիճանը որոշելու համար տրվել են 0-ից (ամենաազատ) մինչև 100 (ամենաքիչ ազատ) միավորներ: 0-30 միավոր ստացած երկրները համարվում են ազատ համացանց ունեցող, 31-60 միավոր ստացածները՝ մասամբ ազատ, իսկ 61-100 միավոր ստացած երկրները՝ ոչ ազատ:

Հավաքելով 28 միավոր՝ Հայաստանը հայտնվել է համացանցի ազատության սանդղակում:

Տարածաշրջանի երկրներից Վրաստանը հավաքել է 24 միավոր, Թուրքիան՝ 58, Ադրբեջանը՝ 56 միավոր, իսկ Ռուսաստանը՝ 62 միավոր:

Համացանցի ազատության սանդղակում առաջատար դիրքում են Իսլանդիան, Էստոնիան և Կանադան, իսկ սանդղակը եզրափակում են Իրանը, Սիրիան և Չինաստանը։