Անսպասելի շրջադարձ՝ երիտասարդ կնոջ աղմկահարույց սպանության գործով

Անցյալ տարվա մայիսին Արարատի մարզի Նոր Կյուրին գյուղի ճանապարհին տեղի ունեցած դաժան սպանության գործով ուշագրավ զարգացումներ են տեղի ունենում: Ըստ նախաքննության՝ 2014թ. մայիսի 7-ին՝ ժամը 14:30-ի սահմաններում, Արարատի մարզի Նոր Կյուրին գյուղի ճանապարհին Սերգեյ Գրիգորյանը գումարային հարցերի շուրջ վիճաբանել էր ընկերոջ կնոջ՝ Վարդուհի Գրիգորյանի հետ։ Վերջինս պարտքով 10.000 ԱՄՆ դոլար էր խնդրել, տղամարդը մերժել էր:  Ծագած վիճաբանության ժամանակ տղամարդն իր մոտ ապօրինի պահվող ատրճանակից կրակել էչ կնոջ թիկունքին, իսկ երբ վերջինս փորձել է դուրս գալ ավտոմեքենայից, երկրորդ կրակոցն է արձակել կրծքավանդակի ուղղությամբ։ Ստացած մարմնական վնասվածքներից կինը մահացել էր: Այնուհետև, ըստ նախաքննական տվյալների, Սերգեյ Գրիգորյանը հանցագործության հետքերը թաքցնելու նպատակով, թաղել էր սպանվածի դին:

Դեպքից օրեր անց Սերգեյ Գրիգորյանը ձերբակալվեց, տվեց ինքնախոստովանական ցուցմունք, նրա նկատմամբ խափանման միջոց ընտրվեց կալանավորումը: Սակայն առերևույթ բացահայտված գործում ուշագրավ հանգամանքներ կան: Նշենք, որ Սերգեյ Գրիգորյանի ձերբակալման ժամանակ նրա մոտից հայտնաբերվեցին և առգրավվեցին ՀՀ մոտ տասը  քաղաքացիների անձնագրեր և մոտ նույնքան կնիքներ և կնիքներ պատրաստելու հարմարանքներ: Yerkir.am-ի տեղեկություններով՝ նախաքննության ընթացքում Սերգեյ Գրիգորյանի մոտ հայտնաբերված անձնագրերի գրեթե բոլորի տերերը ցուցմունք են տվել և հայտնել, որ իրենք փոխել են իրենց անձնագրերը, իսկ հները հանձնել են անձնագրային բաժին: Խոսակցություններ կան, որ անձնագրային բաժանմունքի որոշ պաշտոնյաների մատը խառն է Սերգեյի կողմից հին անձնագրեր ձեռքբերելու գործում:

Այս մասով քրեական գործից մաս առանձնացվեց, իսկ բուն սպանության գործն ուղարկվեց դատարան: Գրիգորյանին մեղադրանք առաջադրվեց ՀՀ ՔՕ 104-րդ հոդվածի (սպանություն) և ՀՀ ՔՕ 235-րդ հոդվածի 1-ին մասի (ապօրինի զենք-զինամթերք պահելը) հատկանիշներով: Թվում էր, թե առանձնացված մասով պետք է լուրջ նախաքննություն ընթանար, և գործը պետք է քններ ՀՔԾ-ն, քանի որ այն ժամանակ խոսակցություններ էին պտտվում, թե անձնագրերի գործով շոշափվում են նաև պաշտոնյաների անուններ, ավելին` խոսակցություններ կային անգամ ՀՀ-ում թրաֆիքինգի խոշոր ցանց բացահայտելու մասին:

Սակայն Yerkir.am-ի լավատեղյակ աղբյուրները հայտնել են, որ առանձնացված մասով քննություն չի կատարվում: Այս կապակցությամբ մենք պաշտոնական հարցում ենք ուղարկել նախաքննական մարմնին: Ներկայումս շատերը թերևս տեղյակ չեն անջատված մասով գործի մասին: Հնարավոր է` մենք նույնպես չանդրադառնայինք դրան, եթե սպանության գործով դատաքննության ժամանակ տեղի չունենային զարմանալի իրադարձություններ:

Այսպես` Սերգեյ Գրիգորյանը ողջ նախաքննության ընթացքում իրեն դրսևորել էր բավական ադեկվատ, և հենց այդ հանգամանքն էլ հիմք էր տվել նախաքննությանը չնշանակել դատահոգեբանական փորձաքննություն, նույնիսկ Սերգեյ Գրիգորյանի պաշտպանի՝ դատահոգեբանական և դատահոգեբուժական փորձաքննություն նշանակելու միջնորդությունն էր մերժվել նախաքննական մարմնի կողմից, իսկ մերժման օրինականությունը հաստատել էր գործը վերահսկող դատախազը:

Սակայն Մասիսի դատարանում սպանության գործի քննության ընթացքում նիստը նախագահող դատավոր Թաթուլ Պողոսյանը զարմանալի շտապողականությամբ բավարարեց պաշտպանի` դատահոգեբանական-դատահոգեբուժական համալիր փորձաքննություն նշանակելու մասին միջնորդությունը: Ավելին` երբ փորձաքննության պատասխանը ստացվեց և պարզվեց, որ Սերգեյ Գրիգորյանը, այնուամենայնիվ, մեղսունակ է, դատավոր Թաթուլ Պողոսյանը բավարարեց պաշտպանի հաջորդ միջնորդությունը` փորձագետներին դատարան հրավիրելու մասին: Երկարատև հարցաքննությունից հետո Թաթուլ Պողոսյանին, այնուամենայնիվ, «հաջողվեց» փորձագետից «կորզել», որ Սերգեյ Գրիգորյանը սպանության ժամանակ եղել է աֆեկտի տակ:

Ի դեպ, այս «տարօրինակ» հարցաքննության ժամանակ դահլիճում չէին տուժողի ներկայացուցիչը և տուժողը:

Փորձագետի հարցաքննությունից հետո Սերգեյ Գրիգորյանի պաշտպանն անմիջապես միջնորդեց նշանակել լրացուցիչ փորձաքննություն` հիմնավորելով նրանով, որ եզրակացությունը և փորձագետի ցուցմունքն իրար չեն համապատասխանում: Զարմանալին այն էր, որ պաշտպանի միջնորդությունը տպագիր էր, և տպավորությունն այնպիսին էր, որ նա անգիր գիտեր և’ դատավորի հարցերը, և’ փորձագետի պատասխանը: Այդ իսկ պատճառով արդեն իսկ տպագիր երեք օրինակից դատարան էր բերել միջնորդությունը: Նշենք, որ հայաստանյան արդարադատության համակարգում եղել են դեպքեր, երբ մեղսունակ մարդիկ «հանկարծ» դարձել են անմեղսունակ, կամ շահադիտական դրդումներով կատարված սպանությունները վերաորակել են որպես հոգեկան խիստ հուզմունքի պայմաններում կատարված սպանություն: Համադրելով վերջին զարգացումները մայր քրեական գործից առանձնացված մասով «տարվող քննության» հետ` արդեն իսկ պարզ է դառնում, թե ինչու է անձնագրերի մասով լռում Սերգեյ Գրիգորյանը:

Հ. Գ. Yerkir.am-ը գործի ընթացքի, ինչպես նաև այս գործով կողմերի դիրքորոշման մասին կներկայացնի հաջորդ հրապարակումներում: