ԵՄ-ն սիրիացի փախստականների համար Թուրքիային 1 մլրդ եվրո կտրամադրի

Եվրամիության ղեկավարների գագաթաժողովում Թուրքիային 1 մլրդ եվրո հատկացնելու որոշում է կայացվել: Գումարը կուղղվի սիրիացի փախստականների կարիքները հոգալուն:

Ըստ NTV-ի՝ Եվրահանձնաժողովի նախագահ Ժան Կլոդ Յունկերը և Եվրախորհրդի նախագահ Դոնալդ Տուսկը մամուլի ասուլիսում նշել են, որ Թուրքիային, Հորդանանին և Լիբանանին հատկացվող օգնության չափերը մեծանալու են:

Ասուլիսի ընթացքում Տուսկն անդրադարձել է Հյուսիսային Սիրիայի տարածքում անվտանգության գոտի ստեղծելուն: Նա շեշտել է նմանօրինակ հարցերի լայն ու ամբողջական քննության անհրաժեշտությունը:

Յունկերը տեղեկացրել է, որ հոկտեմբերի 5-ին Թուրքիայի նախագահ Ռեջեփ Թայիփ Էրդողանի` Բրյուսել պաշտոնական այցի ժամանակ մի շարք հարցեր են քննարկվելու: