Քանաքեռցի Տույի գործով դատական նիստը հերթական անգամ հետաձգվեց

Կենտրոն և Նորք-Մարաշ վարչական շրջանների ընդհանուր իրավասության դատարանում հերթական անգամ հետաձգվեց Քանաքեռցի Տույ մականվամբ հայտնի քրեական հեղինակություն Արթուր Ղազարյանի գործով դատական նիստը: Նշենք, որ այսօր պաշտպանական ճառով պետք է հանդես գար պաշտպանական կողմը, սակայն Ղազարյանի պաշտպաններից Երեմ Սարգսյանն այսօր մասնակցում էր Պերմյակովի գործով փորձաքննությանը, իսկ մյուս պաշտպանը ծանրաբեռնված էր այլ դատական նիստով:

Հիշեցնենք, որ մեղադրող դատախազ Վահե Ասատրյանը Ղազարյանի համար պահանջել էր 1 տարի 6 ամիս ազատազրկում: Արթուր Ղազարյանին մեղադրանք է առաջադրվել գործով չպարզված հանգամանքներում ապօրինի կերպով` հրազեն հանդիսացող «Վիկինգ» մոդելի 9 մմ տրամաչափի գործարանային արտադրության ակոսափող ատրճանակ և ռազմամթերք հանդիսացող 17 փամփուշտ ձեռք բերելու և կրելու համար, դրանք նրա մոտ հայտնաբերվել են ՀՀ ոստիկանության Կենտրոնականի բաժնում կատարված անձնական խուզարկության ժամանակ: Քրեական հեղինակություն Տույը կալանավորվել է հուլիսի 13-ին եւ գտնվում է «Նուբարաշեն» ՔԿՀ-ի բուժմասում: