Առաջարկում են իրավաբանական անձանց համար քրեական պատասխանատվություն նախատեսել

Ամեն ինչ արվում է, որ գոնե այս նստաշրջանի ավարտին ՀՀ քրեական նոր օրենսգրքի նախնական՝ ամփոփ նախագիծը պատրաստ լինի. ասաց ՀՀ արդարադատության նախարարի տեղակալ Արման Թաթոյանը՝ պատասխանելով yerkir.am-ի այն հարցին, թե ե՞րբ նոր օրենսգրքի նախագիծն ամբողջական տեսք կունենա: Փոխնախարարը նշեց, որ վաղվանից հոդված առ հոդված քննարկելու են օրենսգրքի դրույթները:

Նշենք, որ այսօր քննարկում է կազմակերպվել ՀՀ քրեական նոր օրենսգրքի հայեցակարգային հիմնադրույթների վերաբերյալ: Քրեական նոր օրենսգրքի ընդունումը բխում է 2012-16 թթ. դատաիրավական բարեփոխումների ռազմավարական ծրագրից: ՀՀ ՔՕ-ի նոր հայեցակարգը նպատակ է հետապնդում լուծել մի շարք խնդիրներ: Մասնավորապես` հնարավորինս նվազեցնել հանցավորությամբ պայմանավորված սոցիալական լարվածությունը, ապահովել անձի, հասարակության և պետության անվտանգությունը հանցավոր ոտնձգությունից, երաշխավորել հանցագործության զոհի (տուժողի) իրավունքների և ազատությունների պաշտպանությունը, ապահովել քրեական օրենսդրության համապատասխանությունը վավերացված միջազգային պայմանագրային նորմերին և այլն: Քրեական օրենսգրքի հայեցակարգում առաջարկվում է ընդլայնել պատժի համակարգը՝ նախատեսելով ազատազրկմանը այլընտրանք համարվող գործոն պատժամիջոցներ՝ տնային կալանք, ազատության սահմանափակում, հանրային իրավունքներից զրկում, ծնողական իրավունքներից զրկում, օտարերկրյա քաղաքացուն ՀՀ տարածքից վտարում: Բացի այդ` առաջարկվում է ընդլայնել գործող քրեական օրենսգրքում առկա այլընտրանքային պատիժները:

Քրեական օրենսգրքի հայեցակարգը և դրա հիման վրա բուն քրեական օրենսգիրքը մշակող աշխատանքային խումբը համարում են, որ փոփոխությունների կարիք ունի ըստ մեղքի պատասխանատվության սկզբունքը: Օրենսդիրը սահմանել է մեղքի առկայության անհրաժեշտությունը քրեական պատասխանատվության ենթարկելու համար, սակայն չի հստակեցրել, որ անձի քրեական պատասխանատվությունը հնարավոր է միայն այն ծավալով, որքանով որ կատարված արարքը կարող է նրան մեղսագրվել: Աշխատանքային խումբը որպես օրակարգային հարց է դիտարկում իրավաբանական անձանց քրեական պատասխանատվություն նախատեսելը:

ՀՀ կողմից վավերացված միջազգային կոնվենցիաները, պահանջում են, մասնավորապես, կոռուպցիոն հանցագործությունների դեպքում իրավաբանական անձի արդյունավետ պատասխանատվության մեխանիզմներ ունենալ, թեև այդ կոնվենցիաներով չի պահանջվում անպայման քրեական պատասխանատվություն նախատեսել:

Նշենք, որ գործող օրենսգրքով իրավաբանական անձանց համար վարչական պատասխանատվություն է նախատեսվում: