Մինչև կեսգիշեր ակտիվ կրակել են. սահմանամերձ համայնքների ղեկավարներ

Արդեն տեղեկացրել ենք, որ այս գիշեր սահմանին լարված է եղել: Հակառակորդը ժամեր շարունակ կրակել է Տավուշի մարզի սահմանամերձ գյուղերի ուղղությամբ: Yerkir.am-ի հետ զրույցում սահմանամերձ Այգեպարի, Մովսեսի, Բաղանիսի և Ներքին Կարմիրաղբյուրի գյուղապետերը տեղեկացրեցին, որ կրակահերթերը սկսվել են 19:00-ից:

Բաղանիսի գյուղապետ Նարեկ Սահակյանը նշեց, որ 19:00-ից մինչև կեսգիշեր փոխհրաձգությունը շարունակվել է: «Կեսգիշերն անց արդեն իրավիճակը հանգիստ էր, ու առանց կրակահերթերի ենք լուսացրել: Միջպետական ճանապարհը բաց է: Մեզ մոտ, փառք Աստծո, վիրավորներ չկան, բայց նյութական վնասներ ունենք` վնասվել են գյուղացիների տները»,- ասաց գյուղապետը:

Ներքին Կարմիրաղբյուրի գյուղապետ Մանվել Կամենդատյանը ևս ասաց, որ կեսգիշերն անց սահմանին արդեն հանգիստ է եղել, կրակոցները հնչել են 19:00-ից մինչև կեսգիշեր:

Այգեպարի գյուղապետ Անդրանիկ Այդինյանն էլ տեղեկացրեց, որ փոխհրաձգության հետեւանքով գյուղացիները նյութական վնասներ են կրել:

Մովսեսի գյուղապետ Արարատ Ավալյանը ևս հայտնեց, որ նյութական վնասներ են կրել կրակահերթերի պատճառով:

Սահմանամերձ համայնքների ղեկավարները նշեցին նաև, որ գյուղերում խուճապ չկա, իրավիճակը վերահսկվում է, և անխոչընդոտ աշխատում են դպրոցներն ու մանկապարտեզները: