Թուրք զինվորների նոր բարբարոսությունը՝ Վանի հայկական վանքն օգտագործել են որպես զուգարան

Ներկայիս Թուրքիայի տարածքում գտնվող հայկական Վան քաղաքում գտնվող և հանրապետության հռչակումից անց զորամասի տարածքում ներառված հայկական Սուրբ Բարդուղիմեոս եկեղեցին երկար տարիներ թուրք զինվորների կողմից օգտագործվել է որպես զուգարան:

DIHA գործակալությունը տեղեկացնում է, որ գանձ որոնելու նպատակով վանքում փոսեր փորած թուրք ոստիկանները պղծել են սրբապատկերներն ու հայկական խորհրդանիշերը՝ վանքն օգտոգործելով որպես զուգարան:

 Կայքը նշում է, որ Վանի Ալբայրաքի շրջանում գտնվող հայկական պատմական Սուրբ Բարդուղիմեոս վանքը Թուրքիայում հայկական մշակույթի դեմ իրագործված ցեղասպանության վառ վկաներից է:  

«Ենթադրվում է, որ վանքը կառուցվել է 4-րդ դարում՝ Սուրբ Բարդուղիմեոսի գերեզմանի վրա: Հայերի դեմ իրականացված ցեղասպանության տարիներին, որին տալիս են «տեղահանություն» անվանումը, այն ավերել են: Թուրքիայի Հանրապետության հռչակումից հետո եկեղեցին ներառվել է զորամասի տարածքում և օգտագործվել զինվորների կողմից»,- գրել է կայքը:

Նշվում է, որ եկեղեցու ներսի հատվածը ավերվել է տարիների ընթացքում, սակայն դրա արտաքինիին մեծ վնաս են պատճառել հենց թուրք զինվորները: Գանձ որոնելու նպատակով նրանք վանքի ներսում և դրսի հատվածում փոսեր են փորել: «Տարածքում հարթ տեղ գտնել հնարավոր չէ»,- գրում է կայքը՝ հավելելով, որ այս գազանությունը ի հայտ է եկել, երբ 2013 թվականին զինվորները տեղափոխվել են ոստիկանատուն:

Գործակալության հաղորդմամբ՝ ինչպես Թուրքիայում հայկական պատմական շատ արժեքներ, այնպես էլ այս վանքը ներառված է պաշտպանության ենթակա արժեքների ցուցակում: DIHA-ի հետ զրույցում բնակիչներից Ֆաիք Դուրմազը հայտնել է, որ վանքի վերանորոգման համար բազմիցս դիմել են համապատասխան անձանց, սակայն մերժվել են: «Ցանկանում են, որ դա ամբողջովին վերանա: Գյուղացիները երեխաներին և կենդանիներին վանքից հնարավորինս հեռու են պահում, որպեսզի այն ավելի վնաս չկրի»,- ասել է բնակիչը՝ հավելելով, որ «ամեն ինչ անում են, որպեսզի այս արժեքները ոչնչանան, այլապես նրանք արդեն վաղուց կզբաղվեին դրանց վերանորոգման հարցով»:

Թերթի թղթակիցը խնդրի կապակցությամբ կապ է հաստատել շրջանի մշակույթի և զբոսաշրջության տնօրինության հետ: Նրանք հայտնել են, որ դա եղել է զինվորական տարածք, և անգամ իրենք չեն կարողացել մտնել այնտեղ: «Եթե չենք սխալվու՝ նախկինում այդ տարածքի հետ կապված աշխատանքներ կային, սակայն ֆինանսական խնդիրների պատճառով կիսատ մնացին: Հիմա մենք այնտեղ ոչ մի նախաձեռնություն չունենք»,- ասել է պաշտոնյան: