Դավիթ Հարությունյանը Ռուբեն Հայրապետյանի հարցով սպասում է իրավապահների գնահատականներին

ՀՖՖ նախագահ Ռուբեն Հայրապետյանի եւ ՀՀԿ-ական պատգամավոր Մհեր Սեդրակյանի հետ կապված վերջին միջադեպերի առնչությամբ իրականությունը կարող են ասել միայն իրավապահ մարմինները: ՀՀԿ ԳՄ նիստից առաջ այս մասին լրագրողներին ասաց  կառավարության աշխատակազմի ղեկավար-նախարար Դավիթ Հարությունյանը:

«Նման դեպքերում  երբ մարդուն մեղադրում են լուրջ արարքի մեջ, պետք է իրավապահ մարմինները կատարեն բոլոր քայլերը, որպեսզի բացահայտեն իրականությունը:Բազմաթիվ դեպքեր են լինում, որ մարդկանց մեղադրում են հանիրավի: Կարող է մարդը անմիջական որեւէ մասնակցություն չունենալ, յուրաքանչյուրս առիթ ունեցել ենք անցնել նման իրավիճակով, այդ թվում եւ ես: Եւ ամենավտանգավոր բանը կհամարեի, որ ընդամենը ասեկոսեների եւ ընդամենը հայտարարությունների հիման վրա կատարվեն խորը եզրակացություններ»,-ասաց նա: