Հայաստանի սահմանին իրավիճակը հանգիստ է եղել

 Վերջին շրջանում հայ-ադրբեջանական և ղարաբաղա-ադրբեջանական սահմանին իրավիճակը լարված էր: Սահմանամերձ Բաղանիս և Ոսկեպար համայնքների ղեկավարները yerkir.am-ի հետ զրույցում ասացին, որ այս գիշեր սահմանին հանգիստ է եղել և կրակոցներ չեն հնչել:

Բաղանիսի գյուղապետ Նարեկ Սահակյանն ասաց, որ մոտ երեք շաբաթ էին ակտիվ կրակահերթեր սահմանի ուղղությամբ, որի պատճառով շուրջ 4 հեկտար խոտածածկ տարածք է այրվել: «Փառք Աստծո այս գիշեր հանգիստ է եղել, կրակոցներ չեն եղել»,- ասաց գյուղապետը:

Ոսկեպարի գյուղապետ Երվանդ Եգանյանն էլ մեզ հետ զրույցում ասաց, որ վերջին օրերին համեմատաբար հանգիստ է եղել:

«Կոնկրետ այս գիշեր ընդհանրապես կրակոցներ չեն հնչել, նախորդ օրերին շատ քիչ են եղել: Առավել ակտիվ էին մոտ մեկ շաբաթ առաջ»,- ասաց գյուղապետը: