Էներգահամակարգի առողջացման ծրագիրը կնպաստի բնակչության սոցիալական վիճակի բարելավմանը. Երվանդ Զախարյան

«ՀՀ էներգետիկ համակարգի երկարաժամկետ՝ մինչև 2036թ. զարգացման ուղիները» խորագրով միջոցառման ժամանակ ելույթ ունեցավ էներգետիկայի և բնական պաշարների նախարար Երվանդ Զախարյանը` ասելով, որ  միջոցառումը նպատակ ունի հանրության լայն քննարկմանը ներկայացնել էներգետիկ համակարգի` մինչև 2036թ. զարգացման ռազմավարությունը:

«Գիտակցելով, որ զարգացման ծրագրերը կարող են կյանքի կոչվել միայն առողջ համակարգում, դեռ 2014 թվականի մայիսից խորը, բազմակողմանի վերլուծություն իրականացրեցինք  ամբողջ էներգահամակարգում: Արդյունքում` ձևավորվել է առողջացման ծրագիր, որը պետք է ապահովի էներգահամակարգի կայունությունն ու հուսալիությունը»,- ասաց Երվանդ Զախարյանը:

Նախարարի խոսքով` նոր մշակված նախագիծը բացառելու է ՀԷՑ-ում ֆինանսական վնասները, իսկ ծրագրի իրականացումը նպաստելու է անվտանգ, հուսալի և կայուն էներգետիկ համակարգի, կայուն ֆինանսական վիճակի, կանխատեսելի սակագների ձևավորմանը և կորուստների կրճատմանը, սպառողներին մատակարարվող էլեկտրաէներգետիկայի որակի բարձրացմանը: Եվ այդ ամենը կխթանի բնակչության սոցիալական վիճակի բարելավումը»,- ասաց նա:

Նախարարը հավելեց, որ համակարգում դեռ կան բազմաթիվ խնդիրներ, և իրենք պատրաստ են լսել բոլոր մասնագետներին, առաջարկությունների դեպքում` միասին աշխատել: