Իրանը ցանկանում է ԵՏՄ-ի հետ համաձայնագիր կնքել արտոնյալ սակագների մասին

Այսօր տեղի ունեցավ ՀՀ-ում Իրանի դեսպան Մոհամմադ Ռեյիսիի մամուլի ասուլիսը, որի ընթացքում խոսվեց Իրանի նկատմամբ պատժամիջոցների վերացման  և հայ-իրանական հարաբերությունների ընթացքի մասին:

Լրագրողները հարցրեցին, թե ի՞նչ հարցեր են քննարկվելու Իրանի փոխնախագահի` Հայաստան  այցի ժամանակ: Դեսպանը նշեց, որ այդ այցն ավելի շատ երրորդ բարձրավոլտ գծի նախագծի շրջանակներում է լինելու, նախագիծ, որը նույնպես լուրջ ներդրումների կարիք ունի:

«Իրանի ֆինանսական  կարողությունները դեռևս մեծ չեն,  ժամանակ է պետք է, որ այդ ֆինանսական միջոցները ամբողջովին ազատագրվեն, որովհետև պատժամիջոցներ են կիրառվել նաև Իրանի բանկերի նկատմամբ: Մի բան հստակ է, որ Իրանի նպատակն է իրագործել այն նախագծերը,  որոնք ստորագրվել են Հայաստանի հետ»,- ասաց դեսպանը:

Ինչ վերաբերում է ԼՂ հակամարտության նկատմամբ Իրանի դիրքորոշմանը, նա նշեց, որ Իրանը ցանկանում է լավ հարաբերություններ ունենալ հարևան պետությունների հետ` տարածաշրջանում անվտանգության ու խաղաղության պահպանումը համարելով իր երկրի անվտանգության ու խաղաղության պահպանման երաշխիքը:

«Իրանի դիրքորոշումը հակամարտությունների վերաբերյալ այն է, որ դրանք  խաղաղ բանակցությունների միջոցով պետք է  լուծում ստանան, իսկ միջազգային նորմերը լավագույն հնարավորությունն են այդ  հակամարտությունների լուծման համար»,- ասաց դեսպանը:

Ինչ վերաբերում է Իրան-ԵՏՄ հարաբերությունների հեռանկարին, նա նշեց, որ ԵՏՄ-ն բավական մեծ շուկա է նաև Իրանի համար, բացի այդ` ԵՏՄ  անդամ երկրներից որոշ երկրներ Իրանի հարևաններն են:

«Եթե մենք կարողանանք ԵՏՄ-ի հետ համաձայնության գանք արտոնյալ սակագների մասին և կնքենք համաձայնագիր,  ապա դա կարևոր ազդեցություն կունենա Իրան-ԵՏՄ հարաբերությունների վրա»,- ասաց ԻԻՀ դեսպանը: