Ինչպես ճիշտ սնվել ամռանը

Սննդաբան, էնդոկրինոլոգ Հասմիկ Աբովյանը Yerkir.am-ի հետ զրույցում մի քանի օգտակար խորհուրդներ տվեց ամառային սննդակարգի, սննդամթերքի ճիշտ պահպանման վերաբերյալ: Մասնագետը նշեց, որ մեր առօրյա սնունդը պետք է հագեցած լինի սեզոնային մթերքով, որն աճում են  մեր բնակության վայրում:

«Այն կարծիքը, թե ամռանը չի կարելի ուտել միս, ձուկ, սխալ է: Այդ մթերքներն իրենք իրենցով չեն կարող վտանգավոր լինել: Տարվա ցանկացած եղանակին կարելի է  ուտել ցանկացած մթերք, եթե այդ մթերքը որակյալ է, փչացած չէ, եթե վտանգավոր չէ` իր բակտերիալ պարունակությամբ, թույների պարունակությամբ: Այդ ամենից խուսափելու համար ճիշտ մոտեցում է պետք ցուցաբերել տարվա ցանկացած եղանակի»,- ասաց սննդաբանը` հավելելով, որ յուրաքանչյուր մթերք ունի իր պահպանման առանձնահատկությունը, սակայն բոլորի դեպքում էլ շատ կարևոր է մթերքի թարմությունը և մաքրությունը:

Ըստ Հասմիկ Աբովյանի`ցանկացած մրգի մեջ, որտեղ էլ այն պահվի, մի քիչ արագ, մի քիչ դանդաղ, վիտամինները քայքայվում են, սակայն սառնարանում ավելի երկար են վիտամինները պահպանվում:

«Օրինակ` երբ, ասենք, բանանը սկսում է սևանալ, այն արդեն ուտել չարժե, որովհետև զրկվել է օրգանոլեպտիկ հատկություններից: Մարդը պետք է սովորի որակյալ պտուղ-բանջարեղեն ուտելուն»,- ասաց մասնագետը` ընդգծելով. «Կարևորագույն նշանակություն ունի հիգիենայի պահպանումը: Սանիտարահիգիենիկ կանոնները շատ հստակ պետք է պահպանվեն: Սառնարանում չի կարելի դնել որևէ կեղտոտ բան: Նախքան սառնարան դնելը, ամեն ինչը պետք է մանրակրկիտ լվանալ` ձվից սկսած և մրգերով ավարտած»:

Սննդաբանի խոսքով` այս եղանակին յուրաքանչյուր օրգանիզմ ունի առնվազն 3 լիտր ջրի պահանջ: Տարվա մյուս եղանակներին ջրի այդ քանակությունը կարող է հասնել 2 լիտրի: