Շանթ Հարությունյանը մենախցում է. 15 օր չի սնվել, բայց առողջական խնդիրներ չունի

Նոյեմբերի 5-ին Մաշտոցի պողոտայում տեղի ունեցած անկարգությունների գործով կալանավորված Շանթ Հարությունյանի փաստաբան Ինեսա Պետրոսյանն այսօր, ամենայն հավանականությամբ, իր պաշտպանյալին ևս երկու ամսով կալանքի տակ պահելու`  դատարանի` դեկտեմբերի 28-ի որոշման դեմ բողոք կներկայացնի ՀՀ վերաքննիչ դատարան: Այս մասին yerkir.am-ի հետ զրույցում հայտնեց Պետրոսյանը: Նա նաև տեղեկացրեց, որ այսօր` ժամը 13-ի սահմաններում,  կայցելի իր պաշտպանյալին:

Նշենք, որ արդեն 15 օր է, ինչ Շանթ Հարությունյանը հացադուլ է հայտարարել: Yerkir.am-ին   ՀՀ արդարադատության նախարարության քրեակատարողական վարչության հանրային կապերի բաժնից հայտնեցին, որ Շանթ Հարությունյանը ներկայումս գտնվում է «Երևան Կենտրոն» ՔԿՀ-ի մենախցում` բժիշկների հսկողության տակ, և որ, առողջության հետ կապված, առայժմ լուրջ խնդիրներ չունի:

Սակայն դեռևս դեկտեմբերի 28-ին` լրագրողների հետ հանդիպման ժամանակ, Շանթի նախկին կինը` Ռուզաննա Բադալյանը, մտահոգություն էր հայտնել, որ իր նախկին ամուսինն ունի առողջական խնդիրներ` շատ է ծխում, իսկ դեղամիջոցներն ընդունում է առանց սննդի:

Հիշեցնենք, որ Շանթ Հարությունյանը հացադուլ է հայտարարել դեկտեմբերի 24-ին ՝ պահանջելով երաշխիքներ իր անվտանգության համար: