Որքա՞ն կարելի էր տեղ «բրոնյա» անել Բաղրամյանում

ԱԺ պատգամավոր Արագած Ախոյանը Yerkir.am-ի հետ զրույցում  ասաց, որ Բաղրամյան պողոտայում  ամեն ինչ արդեն վաղուց էր ավարտվել:

«Ես կարծում եմ, որ Բաղրամյանում ամեն ինչ արդեն վերջացած էր: Հնարավոր չէ շաբաթներով փակ պահել մայրաքաղաքի գլխավոր պողոտաներից մեկը և տեղ «բրոնյա» անել, առավոտյան գնալ տուն, երեկոյան գալ` մասնակցելու շոուների, զբոսանքների: Դա պողոտա է, սա մայրաքաղաք է, և պետք է բացվեր: Ես կարծում եմ, որ շատ լավ են արել»,- ասաց պատգամավորը:

Նրա կարծիքով`Բաղրամյանում պայքարը նույնիսկ թուլանում էր և կորցնում իմաստը: «Պահանջներն ավելի հստակ էին դրված առաջ, իսկ վերջին օրերին բոլորովին այլ պատկեր էր ստացել այս ամենը: Վերջին օրերին ցուցարարները որևէ բան չէին անում»,- ասաց Ախոյանը` հավելելով, որ նրանց գործողությունները խոսում էին այն մասին, որ օրական մեկ քայլ հետ էին գնում, որովհետև ասելիքը սպառվել էր: