ԲԱՔՈւ-2015. բռնցքամարտիկ Նարեկ Աբգարյանը պարտություն կրեց

Բաքվում ընթացող Եվրոպական խաղերում քիչ առաջ ավարտվեց Նարեկ Աբգարյան - Վիլիան Տանկո մենամարտը: Ինչպես հաղորդում է հավաքականի մամուլի քարտուղար Կարեն Գիլոյանը,  միավորների չնչին տարբերությամբ մեր բռնցքամարտիկը պարտվեց:

«Դա մրցավարների կարծիքն է: Մենք միանգամայն այլ կարծիքի ենք: Չեմ կարող չգրել մի զավեշտի մասին: Ժամանակակից բռնցքամարտում կողային 5 մրցավարներից համակարգիչը ընտրում է 3-ի գնահատականը և վճիռը կայացնում` ելնելով այդ 3-ի գնահատականից: Այս մենամարտում Նարեկին հաղթանակ էին շնորհել Գերմանիայի, Լեհաստանի և Ֆիլիպինի ներկայացուցիչները: Սակայն համակարգիչը, ճակատագրի հեգնանքով, ընտրել էր Բրազիլիայի, Թունիսի և Գերմանիայի ներկայացուցիչներին: Իսկ Բրազիլիայի և Թունիսի ներկայացուցիչների կարծիքով` հաղթել էր մեր մրցակիցը: Ստացվեց 2-1` հօգուտ սլովակ բռնցքամարտիկի»,- ասաց Գիլոյանը: